МУС паведаміла пра спыненне ў Віцебскай вобласці схемы “сістэмнай дзелавой карупцыі”

9 красавіка, Позірк. Схема “сістэмнай дзелавой карупцыі” спыненая супрацоўнікамі па барацьбе з эканамічнымі злачынствамі ў Віцебскай вобласці, паведамляе Міністэрства ўнутраных спраў.

Адзначаецца, што 50-гадовы намеснік дырэктара па камерцыйных пытаннях “аднаго з горадаўтваральных прадпрыемстваў” абласнога цэнтра атрымаў ад 54-гадовага прадстаўніка камерцыйнай структуры 20 тыс. рублёў.

Грошы, як паведамляецца, перадаваліся “за выбар яго фірмы ў якасці пастаўшчыка харчовай сыравіны і своечасовую аплату па дагаворах”.

“Падчас далейшых аператыўна-вышуковых мерапрыемстваў выяўленыя факты дачы хабараў гэтым жа фігурантам траім службовым асобам перапрацоўчых прадпрыемстваў Мінска, Віцебскай і Брэсцкай абласцей на суму каля 30 тыс. рублёў”, — паведаміў начальнік УБЭП УУС Віцебскай вобласці Аляксандр Макарук.

Узбуджаныя крымінальныя справы, заяўлена, што затрыманым пагражае да 10 гадоў пазбаўлення волі.

Паводле даных Вярхоўнага суда, у 2025 годзе за здзяйсненне злачынстваў карупцыйнай накіраванасці асуджана 657 асоб — на 7,3% менш, чым у 2024-м (709). З асуджаных 199 чалавек прыгавораныя да розных тэрмінаў пазбаўлення волі. Пазбаўленне права займаць пэўную пасаду або займацца пэўнай дзейнасцю ў якасці асноўнай меры пакарання прызначана 17 асобам, у якасці дадатковай — 557.