25 ліпеня, Позірк. Латвія ўжо чатыры месяцы — з 25 сакавіка — штодня фіксуе спробы мігрантаў трэціх краін трапіць на яе тэрыторыю праз Беларусь, сведчыць праведзены “Позіркам“ аналіз масіва даных памежнай службы балтыйскай дзяржавы.
За гэты перыяд (122 дні) зарэгістравана агулам 8.509 спробаў незаконнага пераходу мяжы, або 70 у сярэднім за дзень.
У першы месяц (25 сакавіка — 24 красавіка) такіх спробаў было 1.591, у другі (25 красавіка — 24 траўня) — 2.227, у трэці (25 траўня — 24 чэрвеня) — 2.402, у чацвёрты (25 чэрвеня — 24 ліпеня) — 2.289.
З пачатку 2026 года Дзяржаўная памежная ахова Латвіі зафіксавала 8.650 спробаў парушэння мяжы з боку Беларусі, або 42 у сярэднім за суткі (з 1 студзеня па 24 сакавіка — 141, або менш за 2 штосутачна, пры гэтым з 1 студзеня па 1 лютага актыўнасці мігрантаў не было наогул).
Латвія сярод троіх краін Еўрасаюза, што мяжуюць з Беларуссю, сёлета адчувае найбольшую міграцыйную нагрузку: на яе долю прыпадае 87,5% усіх спробаў мігрантаў нелегальна трапіць з беларускай тэрыторыі ў ЕС (28,1% па выніках 2025 года).
