Ліквідаваны на радзіме Беларускі ПЭН-цэнтр працягнуў дзейнасць за мяжой

29 снежня, BPN. Ліквідаваны на радзіме Беларускі ПЭН-цэнтр працягнуў дзейнасць за мяжой. Аб правядзенні ўстаноўчага сходу арганізацыя паведаміла ў сваім тэлеграм-канале. Дата і месца правядзення не ўдакладняюцца.

Старшынёй абрана літаратар Таццяна Нядбай, якая ўзначальвала ПЭН-цэнтр у 2017—2019 гадах. У склад савета арганізацыі ўвайшлі лаўрэат Нобелеўскай прэміі па літаратуры 2015 года Святлана Алексіевіч (узначальвала ПЭН-цэнтр у Беларусі з 2019 года да прымусовага закрыцця), філосаф Вольга Шпарага, паэты Юлія Цімафеева, Андрэй Хадановіч і іншыя літаратары.

Сход зацвердзіў назву арганізацыі на беларускай мове — Беларускі ПЭН, на англійскай мове — PEN Belarus.

У паведамленні падкрэсліваецца, што каштоўнасці арганізацыі выкладзены ў Маніфесце нявызначанага часу, падрыхтаваным ініцыятыўнай групай па стварэнні ПЭН-клуба за мяжой. У дакуменце дэкларуецца падтрымка дэмакратыі, асуджэнне рэпрэсій, а “ў перыяд крызісу і нявызначанасці Беларускі ПЭН лічыць галоўным крытэрыем прыналежнасці да беларускай культурнай супольнасці не тэрытарыяльны, а каштоўнасны”.

Падкрэсліваецца, што арганізацыя з’яўляецца паўнапраўным сябрам Міжнароднага ПЭН-клуба — існуючай з 1921 года праваабарончай няўрадавай арганізацыі, якая аб’ядноўвае прафесійных пісьменнікаў, паэтаў і журналістаў.

Беларускі ПЭН-цэнтр быў створаны ў 1989 годзе. У якасці грамадскага аб’яднання зарэгістраваны Міністэрствам юстыцыі ў лістападзе 1990 года, перарэгістраваны ў кастрычніку 1999-га.

9 жніўня 2021 года Вярхоўны суд ліквідаваў арганізацыю па іску Мінюста, у якім сцвярджалася, што ПЭН-цэнтр атрымліваў бязвыплатную дапамогу з-за мяжы з парушэннем парадку яе прыцягнення. Раней, 14 ліпеня, сілавікі зрабілі ператрус па юрыдычным адрасе арганізацыі. На той момант ПЭН-цэнтр паведамляў, што ў дакументах на ператрус фігуравалі крымінальныя справы па ч. 3 арт. 361 (заклікі да дзеянняў, накіраваных на прычыненне шкоды нацыянальнай бяспецы Беларусі, ажыццёўленыя з дапамогай СМІ або інтэрнэту), ч. 1 арт. 357 (змова або іншыя дзеянні, учыненыя з мэтай захопу або ўтрымання дзяржаўнай улады неканстытуцыйным шляхам), ч. 1 арт. 361¹ (стварэнне экстрэмісцкага фармавання, а таксама фармавання, дзейнасць якога накіравана на рэабілітацыю нацызму, або кіраўніцтва такім фармаваннем або структурным падраздзяленнем, якое ўваходзіць у яго).