Краіны Балтыі просяць АБСЕ склікаць пасяджэнне з удзелам беларускай дэлегацыі ў сувязі з вучэннямі “Саюзная рашучасць — 2022”

13 лютага, BPN. Краіны Балтыі звярнуліся ў АБСЕ з просьбай склікаць пасяджэнне з запрашэннем беларускай дэлегацыі ў сувязі з вучэннямі “Саюзная рашучасць — 2022”.

Латвія, Літва і Эстонія пайшлі на такі крок, не задаволіўшыся адказам на запыт аб войсках, што ўдзельнічаюць у гэтых беларуска-расійскіх вучэннях.

“9 лютага Літва ад імя трох балтыйскіх дзяржаў накіравала Беларусі запыт у адпаведнасці з Венскім дакументам АБСЕ ў сувязі з сумеснымі вучэннямі <…> на тэрыторыі Беларусі 10—20 лютага, — гаварылася ў паведамленні МЗС Эстоніі. — Падрыхтоўка і правядзенне ваенных вучэнняў павінныя быць празрыстымі і адпавядаць міжнародным абавязацельствам.На жаль, інфармацыі, што давалася Беларуссю, да гэтага часу было недастаткова. Мэтай запыту было атрыманне інфармацыі, якая павысіла б празрыстасць і ўпэўненасць у тым, як будуць разгортвацца і выкарыстоўвацца расійскія і беларускія войскі падчас вучэнняў і пасля іх”.

У эстонскім знешнепалітычным ведамстве адзначылі, што накіраваны Беларуссю адказ “застаўся недастатковым”.

Міністэрства замежных спраў Літвы паведаміла, што краіны Балтыі запатрабавалі ад Мінска ўдакладніць “колькасць расійскіх і беларускіх вайскоўцаў, якія бяруць удзел у манеўрах, ваенную тэхніку, што выкарыстоўваецца, і плануемыя тэрміны вяртання часцей у месцы пастаяннай дыслакацыі”.

Палічыўшы адказ Мінска недастатковым, краіны Балтыі звярнуліся ў АБСЕ з просьбай на працягу 48 гадзін арганізаваць пасяджэнне з удзелам беларускай дэлегацыі.

“Беларусь заявіла, што ў вучэннях удзельнічае не больш за 13.000 ваеннаслужачых, што з’яўляецца парогам для прадастаўлення інфармацыі ў рамках Венскага дакумента. Аднак агульнадаступная інфармацыя і інфармацыя, якую мае Мінабароны Латвіі, адназначна ўказваюць на тое, што ў беларуска-расійскіх вучэннях задзейнічана колькасць войскаў і баявой тэхнікі, якое значна перавышае гэты парог”, — гаворыцца ў заяве МЗС Латвіі.

На думку афіцыйнай Рыгі, “агрэсіўная рыторыка” Расіі і канцэнтрацыя сіл ля межаў Украіны, непразрыстыя шырокамаштабныя сумесныя ваенныя вучэнні ў Беларусі выклікаюць асцярогі наконт бяспекі і падрываюць механізмы кантролю над узбраеннямі і бяспеку ў рэгіёне АБСЕ”.

У заяве таксама адзначаецца, што хаця Беларусь і Расія прыпынілі кантроль над узбраеннямі на падставе пандэміі COVID-19, яна не перашкодзіла маштабнай мабілізацыі войскаў.

“У кантэксце гэтых вучэнняў Беларусь, як і Расія, выбарча падыходзіць да сваіх абавязацельстваў па кантролі над узбраеннямі, адмаўляючыся ад інспекцый, якія маглі б даць больш інфармацыі аб характары яе ваеннай актыўнасці, але замест гэтага прапаноўваючы праводзіць абмежаванае назіранне за ваеннымі вучэннямі праз двухбаковыя пагадненні”, — заявіў латвійскі МЗС.