Лукашэнка арыентаваў Мінскі завод грамадзянскай авіяцыі на стварэнне свайго самалёта і асваенне “вайсковых напрамкаў”

11 жніўня, Позірк. Магчымасць вытворчасці ў Беларусі грамадзянскіх паветраных суднаў не выключыў Аляксандр Лукашэнка 11 жніўня падчас наведвання прадпрыемства “Мінскі завод грамадзянскай авіяцыі № 407” (знаходзіцца на тэрыторыі нацыянальнага аэрапорта Мінск). 

“Мы будзем рабіць усё, каб падтрымліваць напрамкі рамонту і абслугоўвання, а можа быць, стварэння, будаўніцтва сваіх самалётаў, — цытуе Лукашэнку яго прэс-служба. — Мы гэта будзем прасоўваць. У нас дзве такія буйныя пляцоўкі: у Баранавічах вайсковы завод і тут грамадзянскі”. 

Ён заявіў, што будзе “толькі ўдзячны” і акажа падтрымку, калі завод асвоіць “нешта з вайсковых напрамкаў”. Падтрымка таксама будзе аказаная, калі 558-ы авіярамонтны завод у Баранавічах (Брэсцкая вобласць) будзе “нешта рабіць для грамадзянскіх”.

“Стварыўшы вытворчасць легкавых аўтамабіляў, у мяне такая шалёная думка (калі я паспею гэта пачаць пры сваім прэзідэнцкім жыцці) — калі нам удасца разгарнуцца і вырабляць свой лятальны апарат, я буду шчаслівы. Значыць, мая новая мара можа спраўдзіцца. Вось я маю такую шалёную думку па паглыбленні вытворчасці грамадзянскіх самалётаў. Мы асвоілі рамонт, тэхнічнае абслугоўванне. Прэтэнзій практычна да вас няма з боку заказчыкаў. Будзем рухацца далей”, — сказаў Лукашэнка. 

9 жніўня, у трэцюю гадавіну прэзідэнцкіх выбараў у Беларусі, ЗША ўвялі санкцыі супраць Мінскага завода грамадзянскай авіяцыі. 

Баранавіцкі авіярамонтны завод трапіў пад абмежаванні Вялікабрытаніі, ЗША, Украіны, Японіі ды іншых краін яшчэ ў 2022 годзе.