Лукашэнка заявіў пра дыскрэдытацыю міжнароднага права ў сферы кантролю над узбраеннямі

15 жніўня, Позірк. Цяперашняя міжнародная абстаноўка “застаецца беспрэцэдэнтна напружанай”, адзначыў Аляксандр Лукашэнка 15 жніўня ў пасланні ўдзельніках XI Маскоўскай канферэнцыі па міжнароднай бяспецы.

На яго думку, “абвастрыліся практычна ўсе вядомыя выклікі і пагрозы”. “Дыскрэдытаванае міжнароднае права ў сферы кантролю над узбраеннямі, — прыводзіць тэкст паслання прэс-служба Лукашэнкі. — Нарастаюць рызыкі прымянення зброі масавага знішчэння, у тым ліку правакацыі з выкарыстаннем ядзерных і біялагічных сродкаў паражэння”.

“Магутным фактарам эканамічнай і нацыянальнай нестабільнасці для ўсіх без выключэння дзяржаў”, лічыць ён, з’яўляюцца “інфармацыйныя войны і кіберзлачынствы”. Акрамя таго, на думку Лукашэнкі, санкцыі сталі “новым відам зброі, які падрывае сістэму міжнародных гандлёва-эканамічных сувязей”. З “інструмента прымусу да міру і бяспекі” яны “ператварыліся ў комплексную пагрозу глабальнага маштабу”.

Паводле сцвярджэння Лукашэнкі, Беларусь застаецца “паслядоўным прыхільнікам забеспячэння міру і бяспекі”.

“Выконваючы раней узятыя на сябе міжнародныя абавязацельствы, Рэспубліка Беларусь разам з партнёрамі, а таксама ў рамках Саюзнай дзяржавы Беларусі і Расіі прыкладае максімум намаганняў для ўмацавання ўзаемадзеяння ў барацьбе з транснацыянальнымі выклікамі і пагрозамі рознага характару. Размяшчаючы тактычную ядзерную зброю на беларускай тэрыторыі, мы адэкватна рэагуем на паскораную мілітарызацыю Усходняй Еўропы і рост ваеннай актыўнасці ЗША і НАТО”, — гаворыцца ў пасланні.

Усё гэта, паводле яго слоў, не адмяняе “мірныя ініцыятывы”, якія выстаўляюцца беларускім бокам у інтарэсах “перазапуску дыялогу па пытаннях еўрапейскай і глабальнай бяспекі на роўных умовах на карысць усёй планеты”.

13 чэрвеня 2023 года падчас паездкі ў Мінскую вобласць Лукашэнка заявіў, што гатовы “неадкладна і без ваганняў” выкарыстаць ядзерную зброю ў выпадку агрэсіі супраць Беларусі, адзначыўшы, што частка тактычных зарадаў ужо дастаўленая ў краіну з Расіі. Праз некалькі дзён, 16 чэрвеня, прэзідэнт РФ Уладзімір Пуцін заявіў, што астатняя частка запланаванай тактычнай ядзернай зброі (ТЯЗ) будзе перамешчаная ў Беларусь “да канца лета ці да канца года”.

1 жніўня Лукашэнка паведаміў, што больш за палову ТЯЗ завезена і разгрупавана на тэрыторыі Беларусі.