Урад мае намер накіраваць да 500 тыс. рублёў на рэканструкцыю дзвюх цэркваў у Жыровіцкім манастыры

13 жніўня, BPN. Урад мае намер накіраваць да 500 тыс. рублёў на рэканструкцыю дзвюх цэркваў у Свята-Успенскім мужчынскім стаўрапігіяльным манастыры ў Жыровічах (Слонімскі раён Гродзенскай вобласці), вынікае з пастановы Савета міністраў № 526 ад 12 жніўня “Аб фінансаванні расходаў рэспубліканскага бюджэту”.

Дакумент, апублікаваны 13 жніўня на Нацыянальным прававым інтэрнет-партале, прадугледжвае змяненне пераліку будоўляў і аб’ектаў, якія падлягаюць фінансаванню ў рамках дзяржаўнай інвестыцыйнай праграмы на 2022 год.

Пералік дапоўнены пунктамі аб рэканструкцыі Яўленскай і Георгіеўскай цэркваў, размешчаных на тэрыторыі Жыровіцкага манастыра. Для кожнага аб’екта ўстаноўлены ліміт фінансавання — 250 тыс. рублёў.

Міністэрству эканомікі даручана ўлічыць гэта пры падрыхтоўцы нарматыўнага акта аб унясенні змяненняў у інвестпраграму, зацверджаную ўказам Аляксандра Лукашэнкі № 18 ад 26 студзеня, а Міністэрству фінансаў — “зрабіць захады па рэалізацыі” гэтай пастановы.

У цяперашні час Беларускі экзархат узначальвае мітрапаліт Веніямін (у свецкім жыцці Віталь Тупека) — першы ўраджэнец Беларусі сярод кіраўнікоў гэтай структурнай адзінкі Рускай праваслаўнай царквы. Свяшчэнны сінод РПЦ прызначыў яго на мінскую кафедру 25 жніўня 2020 года. Ён змяніў мітрапаліта Паўла (цяпер мітрапаліт Круціцкі і Каломенскі, патрыяршы намеснік Маскоўскай мітраполіі), які быў адкліканы з Беларусі неўзабаве пасля пачатку поствыбарных пратэстаў, адзначыўшыся выказваннямі пра гвалт, у тым ліку з боку сілавікоў і наведваннем у бальніцы пацярпелых на акцыях.

Адразу пасля прызначэння Веніямін стаў не ў прыклад часцей за папярэднікаў сустракацца з Аляксандрам Лукашэнкам, актывізаваў супрацоўніцтва царквы з органамі ўлады, стаў браць актыўны ўдзел у дзяржаўных мерапрыемствах. Неаднаразова ўхваляўся Лукашэнкам фактычна за лаяльнасць да ўлады і прадзяржаўную пазіцыю.

Праваслаўе ў Беларусі лічыцца дамінуючай хрысціянскай канфесіяй. Руская праваслаўная царква лічыць беларускую зямлю сваёй кананічнай тэрыторыяй. Беларускі экзархат РПЦ ацэньвае колькасць вернікаў у чатыры мільёны. Праваслаўная царква ў Беларусі налічвае паўтары тысячы прыходаў у 15 епархіях, чатыры з якіх аб’яднаныя ў Мінскую мітраполію.