35 краін гатовыя байкатаваць Алімпіяду-2024 у выпадку допуску Беларусі і РФ — прэм’ер-міністр Украіны

15 жніўня, Позірк. “Спорт і ваенная агрэсія несумяшчальныя”, таму дзяржавы, якія “заплямілі сябе крывёй украінцаў, не могуць удзельнічаць у Алімпійскіх гульнях”, напісаў у сваім тэлеграм-канале прэм’ер-міністр Украіны Дзяніс Шмыгаль.

Паводле яго даных, за час поўнамаштабнай вайны Расія “забіла 340 украінскіх спартсменаў і трэнераў, разбурыла або пашкодзіла 343 спартыўныя аб’екты”, штодня “атакуе мірныя гарады і вёскі ракетамі і дронамі”.

Шмыгаль падкрэсліў, што створана “магутная міжнародная кааліцыя за сумленны спорт, якая ўключае 35 дзяржаў”. “Разам мы гатовыя байкатаваць Алімпійскія гульні [26 ліпеня — 11 жніўня 2024 года] у Парыжы, калі Расія і Беларусь будуць дапушчаныя да ўдзелу ў спаборніцтвах”, — адзначыў кіраўнік украінскага ўрада. 

Гэтая кааліцыя, паведаміў ён, чакае, што Міжнародны алімпійскі камітэт (МАК) “прыме правільнае рашэнне і рашуча адхіліць агрэсара” ад АГ-2024. 

Раней МАК накіраваў 203 нацыянальным камітэтам афіцыйнае запрашэнне ўзяць удзел у 33-х Алімпійскіх гульнях. На іх не запрошаныя алімпійскія камітэты Беларусі, Гватэмалы і Расіі. 

Рашэнне пра індывідуальны ўдзел беларускіх і расійскіх спартсменаў у нейтральным статусе будзе прынятае пазней. 

28 лютага 2022 года, праз некалькі дзён пасля пачатку развязанай супраць Украіны вайны, Міжнародны алімпійскі камітэт заклікаў спартыўныя федэрацыі не дапускаць да спаборніцтваў атлетаў з Беларусі і РФ. Гэтая рэкамендацыя была неадкладна і масава прынята да выканання, у выніку чаго расійскі і беларускі спорт аказаўся амаль у поўнай ізаляцыі. 

25 студзеня 2023-га выканкам гэтай арганізацыі пацвердзіў санкцыі, але адзначыў, што ніводнаму спартсмену нельга забараняць удзельнічаць у спаборніцтвах “толькі праз яго пашпарт”. 

28 сакавіка МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у міжнародных спаборніцтвах. 

Пры гэтым павінен быць выкананы шэраг умоў. Беларускія і расійскія атлеты могуць спаборнічаць “у якасці індывідуальных нейтральных спартсменаў” (без выкарыстання флага, гімна і іншай сімволікі сваіх дзяржаў) і толькі ў тым выпадку, калі яны “актыўна не займаліся падтрымкай баявых дзеянняў” і не маюць дзейных кантрактаў з сілавымі і ваеннымі ведамствамі сваіх краін.