Байдэн: Нават у зняволенні Алесь Бяляцкі ніколі не адмаўляўся ад патрабавання дэмакратычных свабодаў, якіх заслугоўвае беларускі народ

7 кастрычніка, BPN. “Нават знаходзячыся ў зняволенні, Алесь Бяляцкі ніколі не адмаўляўся ад патрабавання дэмакратычных свабод, якіх заслугоўвае беларускі народ”, — заявіў прэзідэнт ЗША Джо Байдэн з нагоды абвяшчэння лаўрэатаў Нобелеўскай прэміі міру за 2022 год.

“Лаўрэаты Нобелеўскай прэміі міру гэтага года нагадваюць нам аб тым, што нават у змрочныя дні вайны, перад тварам запалохвання і прыгнёту, агульначалавечае імкненне да правоў і годнасці не можа быць задушанае. Ад імя амерыканскага народа віншую Алеся Бяляцкага з Беларусі, украінскі Цэнтр грамадзянскіх свабод і расійскую арганізацыю “Мемарыял” з заслужанай узнагародай”, — сказаў прэзідэнт ЗША.

Паводле яго слоў, лаўрэаты прэміі на працягу многіх гадоў нястомна змагаліся за правы чалавека і асноўныя свабоды, у тым ліку права свабодна гаварыць і адкрыта крытыкаваць, выконвалі сваю місію з запалам і настойлівасцю.

“На працягу ўсёй сваёй гісторыі “Мемарыял” раскрываў праўду пра жорсткае абыходжанне з савецкімі і расійскімі грамадзянамі, нягледзячы на інтэнсіўныя запалохванні. Алесь Бяляцкі ніколі не адмаўляўся ад патрабавання дэмакратычных свабод, якіх заслугоўвае беларускі народ, нават знаходзячыся ў зняволенні. А ў разгар жорсткай і несправакаванай вайны Расіі супраць Украіны Цэнтр грамадзянскіх свабод у рэжыме рэальнага часу дакументуе ваенныя злачынствы і злачынствы, якія Расія здзяйсняе ў дачыненні да ўкраінскага народа”, — заявіў амерыканскі лідар.

Смельчакі, якія выконваюць гэтую працу, дабіваліся праўды і дакументавалі для ўсяго свету палітычныя рэпрэсіі ў дачыненні да сваіх суграмадзян, гаварылі і гнулі сваю лінію, “калі ім пагражалі тыя, хто дабіваўся іх маўчання”, падкрэсліў Байдэн. Гэтым самым, лічыць прэзідэнт ЗША, яны зрабілі свет мацнейшым.

“Алесь Бяляцкі, Цэнтр грамадзянскіх свабод і “Мемарыял” заслугоўваюць прызнання за праведзеную імі працу, пададзены імі прыклад і надзею на лепшую будучыню, якую яны выклікаюць сваёй непахіснай прыхільнасцю да асноўных свабод”, — заявіў Джо Байдэн.