У другія ўгодкі разгрому БелаПАН швейцарскі дэпутат зноў запатрабавала вызваліць экс-дырэктара Наважылава — свайго сімвалічнага “хросніка”

18 жніўня, Позірк. “Свабода меркаванняў, як і свабода прэсы — неад’емныя апоры моцнай дэмакратыі. Пераслед і парушэнне гэтых прынцыпаў дзяржавай з’яўляюцца яўнымі парушэннямі правоў чалавека”. Пра гэта заявіла “Позірку” дэпутат Нацыянальнага савета (ніжняй палаты) Федэральнага сходу (парламента) Швейцарыі Мін Лі Марці, якая з’яўляецца сімвалічнай хроснай палітвязня, былога дырэктара інфармацыйнай кампаніі БелаПАН Дзмітрыя Наважылава.

18 жніўня споўнілася два гады з моманту разгрому БелаПАН: ператрусу ў офісе і кватэрах супрацоўнікаў, канфіскацыі абсталявання, затрыманні Дзмітрыя Наважылава і яго пераемніцы на пасадзе дырэктара — галоўнага рэдактара Ірыны Леўшынай.

Сама прафесійная журналістка, Марці ў лютым 2022 года ўзяла шэфства над Дзмітрыем Наважылавым у межах кампаніі салідарнасці #WeStandBYyou, якую аб’явіла нямецка-швейцарская праваабарончая арганізацыя Libereco.

“Зноў заклікаю беларускі рэжым неадкладна вызваліць Дзмітрыя Наважылава і паважаць свабоду прэсы”, — заявіла швейцарскі парламентарый. Паводле слоў Марці, яна з найвялікшай павагай ставіцца да тых, хто нават у неспрыяльных умовах, як у Беларусі, адстойвае дэмакратыю і правы чалавека. “Выказваю поўную салідарнасць з імі”, — сказала дэпутат.

Па “справе БелаПАН” 6 кастрычніка 2022 года рашэннем Мінскага абласнога суда (суддзя Вячаслаў Тулейка, унесены ў санкцыйныя спісы дэмакратычных краін Захаду) Наважылаў быў прыгавораны да 6 гадоў пазбаўлення волі і аштрафаваны на 700 базавых велічынь (на той момант 22,4 тыс. рублёў). Абвінавачваўся ў стварэнні “экстрэмісцкага фармавання” па ч. 1 арт. 361¹ і нявыплаце падаткаў у буйным памеры па ч. 2 арт. 243 Крымінальнага кодэкса.

Наважылаў адбывае тэрмін у папраўчай калоніі № 3 (пасёлак Віцьба, Віцебскі раён). Па-ранейшаму працуе ў швейным цэху, на здароўе і ўмовы ўтрымання не скардзіцца. 12 жніўня сустрэў там свой 51-ы дзень нараджэння. Паўвекавы юбілей летась адзначыў у мінскім СІЗА №1.

Сімвалічная хросная Ірыны Леўшынай (са снежня 2021 года) — дэпутат нямецкага бундэстага Мерле Шпелерберг — знаходзіцца ў адпачынку, але збіраецца зрабіць заяву ў бліжэйшы час, паведамілі “Позірку” у яе бюро. Летась 29 лістапада, у дзень нараджэння Леўшынай, парламентарый адзначыла, што яе падапечная “сядзіць у турме за выказванне сваёй думкі ва ўмовах рэжыму, які не прымае свабодныя думкі”. “Яе ўзяцце пад варту — прыклад парушэння правоў чалавека, якое ў Беларусі з’яўляецца звыклай з’явай”, — адзначалася ў заяве дэпутата, якая паступіла ў “Позірк”. Шпелерберг запатрабавала неадкладна вызваліць Леўшыну і іншых беларускіх палітвязняў.

Ляўшына была прыгаворана да 4 гадоў пазбаўлення волі па ч. 1 арт. 361¹. Утрымліваецца ў жаночай ПК №4 у Гомелі. Працуе ў швейным цэху, адчувае сябе добра, на ўмовы ўтрымання не скардзіцца.

Па “справе БелаПАН” праходзілі таксама былы намеснік дырэктара кампаніі, медыяменеджар Андрэй Аляксандраў і яго будучая жонка Ірына Злобіна. Абодва былі затрыманыя 12 студзеня 2021 года. Аляксандраў прыгавораны да 14 гадоў пазбаўлення волі па абвінавачанні ў стварэнні “экстрэмісцкага фармавання”, “здрадзе дзяржаве”, нявыплаце падаткаў у буйным памеры, падрыхтоўцы грамадзян для ўдзелу ў беспарадках (ч. 2 арт. 342 КК), што выяўлялася ў пагашэнні штрафаў удзельнікам пратэстаў супраць фальсіфікацыі вынікаў прэзідэнцкіх выбараў. Злобіна атрымала 9 гадоў, абвінавачвалася ў “здрадзе дзяржаве” і падрыхтоўцы грамадзян для ўдзелу ў беспарадках. Першы аштрафаваны на 1.000 базавых велічыняў (32 тыс. рублёў), другая — на 800 (25,6 тыс.).

Аляксандраў утрымліваецца ў наваполацкай ПК №1, раней выдзяляў медзь з кабеляў, цяпер заняты ў цэху дрэваапрацоўкі, пачуваецца добра. Дазволена перапіска з жонкай, з якой ён аформіў шлюб у мінскім СІЗА № 1 у верасні 2022 года. Злобіна, як і Леўшына, адбывае тэрмін у жаночай гомельскай калоніі.