Ціханоўская прызначыла Крысціну Рыхтэр дарадцай па прававых пытаннях

29 снежня, BPN. Дэмакратычны лідар Святлана Ціханоўская прызначыла Крысціну Рыхтэр дарадцай па прававых пытаннях, паведамляе тэлеграм-канал палітыка.

Адзначаецца, што на новай пазіцыі Рыхтэр працягне каардынаваць працу па прыцягненні асоб, адказных за парушэнне правоў чалавека з выкарыстаннем інструментаў універсальнай юрысдыкцыі і іншых міжнародных механізмаў у супрацоўніцтве з Аб’яднаным пераходным кабінетам і іншымі арганізацыямі.

Яна будзе фармаваць стратэгію працы па прававых пытаннях офіса Ціханоўскай, займацца падрыхтоўкай нарматыўна-прававых дакументаў для транзітнага перыяду “ў сферах пераходнай справядлівасці, рэабілітацыі асоб, якія падвергліся пераследу па палітычных матывах”, удзельнічаць у падрыхтоўцы спецыяльнага дакладу па праблемах беларусаў у эміграцыі ў ПАСЕ.

З сярэдзіны 2021 года Рыхтэр працавала юрыстам у офісе Ціханоўскай. Яна каардынавала альтэрнатыўны даклад па выкананню Беларуссю Мэт устойлівага развіцця ААН.