Старшыня “Маладога фронту” Урбановіч ізноў паранены на расійска-ўкраінскай вайне

6 студзеня, BPN. Ізноў паранены лідар “Маладога фронту”, баец палка Каліноўскага Дзяніс Урбановіч.

“4 студзеня быў цяжкі бой пад Бахмутам, і Дзяніс быў паранены. Куля патрапіла яму ў грудзі. У той жа дзень зрабілі аперацыю, сёння ён апрытомнеў”, — распавялі BPN сябры Урбановіча.

“Ішоў бой зраніцы, пачалася перастрэлка. Суткі бою. Лекары кажуць, што сур’ёзнага нічога, усё зажыве”, — заявіў сябрам сам Урбановіч.

Плануецца, што раніцай 6 студзеня яго павязуць у Кіеў на лячэнне.

У лістападзе Урбановіча параніла ў руку.

Грамадскі актывіст Дзяніс Урбановіч узначаліў “Малады фронт” у 2018 годзе.

У чэрвені 2020-га і сакавіку — красавіку 2021 года ён адбываў 15-сутачны адміністрацыйны арышт. У жніўні 2021 года Урбановіча затрымлівалі ў Нароўлі (Гомельская вобласць), падазравалі ў арганізацыі масавых беспарадкаў у Мазыры ў жніўні 2020 года.

Урбановіч у канцы 2021 года праз рызыку крымінальнага пераследу нелегальна выехаў ва Украіну і цяпер ваюе супраць Расіі ў палку Каліноўскага. У траўні 2022 года быў цяжка кантужаны.

Летась у жніўні “Малады фронт” прызнаны беларускімі ўладамі “экстрэмісцкім фармаваннем”.