Праваабаронцы паведамілі пра самагубства 19-гадовага экс-палітвязня

11 кастрычніка, Позірк. Былы палітвязень 19-гадовы Кірыл Шчаглоў пакончыў з сабой, паведаміла 11 кастрычніка праваабарончая ініцыятыва dissidentby.

Удакладняецца, што гэта адбылося ў лютым 2023 года пасля заканчэння тэрміну пакарання палітвязня. Абставіны трагедыі невядомыя.

3 лютага 2022 года ва ўзросце 18 гадоў Шчаглоў быў прыгавораны судом Кастрычніцкага раёна Гродна да 1,5 года абмежавання волі без накіравання ў папраўчую ўстанову адкрытага тыпу (ПУАТ) паводле арт. 368 Крымінальнага кодэкса (абраза прэзідэнта). Па адной з ім справе праходзілі яшчэ двое палітвязняў — 30-гадовы Максім Рушніцкі і 16-гадовы Кірыл Належынскі (прысуды невядомыя).

Пазней па нявысветленых праваабаронцамі падставах Шчаглову зрабілі больш жорсткім пакаранне, перавёўшы на тры месяцы ў папраўчую калонію.

Палітвязень быў унесены ў спіс “асоб, якія маюць дачыненне да экстрэмісцкай дзейнасці”.

8 ліпеня гэтага года ў бабруйскай папраўчай калоніі № 2 (Магілёўская вобласць) пакончыў з сабой 40-гадовы мужчына (прозвішча невядомае), асуджаны паводле арт. 328 КК (незаконны абарот наркатычных сродкаў, псіхатропных рэчываў, іх прэкурсораў і аналагаў).

У сакавіку спробу суіцыду зрабіў палітвязень супрацоўнік “Радыё Свабода” Ігар Лосік, асуджаны на 15 гадоў пазбаўлення волі.

30 траўня 2022 года загінуў рабочы ААТ “Нафтан” (Наваполацк, Віцебская вобласць) Уладзімір Крысёнак, які ў 2020 годзе браў удзел у страйку на прадпрыемстве. Яго знайшлі павешаным дома. 24 траўня мужчына быў затрыманы сілавікамі і праз 72 гадзіны адпушчаны пад заклад.

У студзені 2022-га асуджаны па палітычных матывах да 2 гадоў абмежавання волі з накіраваннем у ПУАТ 43-гадовы жыхар Смаргоні (Гродзенская вобласць) Дзмітрый Дудойць збег падчас візіту ў паліклініку і пакончыў з сабой, саскочыўшы з моста. Адбываў пакаранне ў ПУАТ № 43 у Магілёве.

У маі 2021 года загінуў, скінуўшыся з 16-га паверха мінскага інтэрната, 17-гадовы сірата Дзмітрый Стахоўскі, на якога завялі крымінальную справу за ўдзел у акцыях пратэсту.