Чарвякоў, які ўзначальваў Мінэканомікі, прызначаны амбасадарам у Кітаі, экс-дырэктар ДФР КДК Маршалаў — у Зімбабвэ (дапоўнена)
Аляксандр Чарвякоў і Ігар Маршалаў
20 лістапада, Позірк. Аляксандр Чарвякоў, які да сёння займаў пасаду міністра эканомікі, прызначаны амбасадарам Беларусі ў Кітаі, экс-дырэктар Дэпартамента фінансавых расследаванняў Камітэта дзяржкантролю Ігар Маршалаў — амбасадарам у Зімбабвэ.
Адпаведныя кадравыя рашэнні 20 лістапада прыняў Аляксандр Лукашэнка, паведамляе яго прэс-служба.
Чарвякоў — выпускнік Беларускай дзяржаўнай сельскагаспадарчай акадэміі (горад Горкі ў Магілёўскай вобласці), кандыдат тэхнічных навук, дацэнт. У 2010–2017 гадах узначальваў Навукова-даследчы эканамічны інстытут Міністэрства эканомікі. Пасля быў намеснікам, першым намеснікам міністра эканомікі, у студзені 2020 года ўзначаліў міністэрства.
Чарвякоў змяніў на пасадзе амбасадара ў Кітаі Юрыя Сянько, які прадстаўляў Беларусь у гэтай краіне з лістапада 2020 года, а да таго быў старшынёй Дзяржаўнага мытнага камітэта.
Ігар Маршалаў нарадзіўся ў 1972 годзе ў Шклове (Магілёўская вобласць). Скончыў Вольскую вышэйшую ваенную вучэльню тылу (Саратаўская вобласць Расіі), Беларускі камерцыйны ўніверсітэт кіравання і Акадэмію кіравання пры прэзідэнце.
З 2013 года працаваў намеснікам старшыні Камітэта дзяржаўнага кантролю — дырэктарам Дэпартамента фінансавых расследаванняў.
Дагэтуль пасаду амбасадара пасла ў Зімбабвэ па сумяшчальніцтве займаў амбасадар у ПАР. Асобная амбасада Беларусі ў зімбабвійскай сталіцы Харарэ адкрылася ў ліпені 2022 года.
Паводле інфармацыі прэс-службы Лукашэнкі, 20 лістапада амбасадарам Беларусі ў ПАР і па сумяшчальніцтве ў Батсване, Мазамбіку і Намібіі назначаны Ігар Белы; Сербіі і па сумяшчальніцтве ў Паўночнай Македоніі — Сяргей Маліноўскі; Інданезіі і па сумяшчальніцтве ў Малайзіі, Сінгапуры і Філіпінах — Раман Раманоўскі.
Акрамя таго, Лукашэнка ўзгадніў кандыдатуру Аляксандра Мацукова на пасаду генеральнага консула Беларусі ў Мумбаі (Індыя).
