Эксперт: Беларусь з калідора паміж Еўропай і Азіяй амаль ператварылася ў “паўвостраў” з выхадам толькі на Усход

24 лістапада, Позірк. Беларусь “з калідора паміж Еўропай і Азіяй амаль ператварылася ў “паўвостраў” з адзіным выхадам — на Усход”, такое меркаванне выказаў навуковы супрацоўнік Цэнтра постсавецкіх даследаванняў Інстытута сусветнай эканомікі і міжнародных адносін Расійскай акадэміі навук Аляксандр Прыходзька ў артыкуле на партале eurasia.expert.

Ён лічыць гэта следствам “эканамічнага ціску з боку Захаду” і “аднабаковых абмежаванняў трансгранічных перавозак” з боку краін Балтыі.

На думку аўтара, на пачатку 2023 года Беларусь “фактычна дасягнула столі магчымасцяў па пераразмеркаванні таварных патокаў у рамках “экспартнага манеўру”, асвоіўшы большую частку даступных рынкаў”. Гэта дазволіла Мінску, лічыць ён, “утрымаць сацыяльна-эканамічную сітуацыю ў краіне”. “Ключавую ролю” ў гэтым плане, адзначыў Прыходзька, адыграла Расія, якая “выдзеліла Беларусі доступ на свой рынак, у тым ліку і для тавараў, якія раней расійскім бокам не закупляліся ў значных аб’ёмах (прадукцыя нафтавай галіны)”.

Для Беларусі РФ з’яўляецца “ключавым эканамічным партнёрам”, “асноўнай крыніцай знешніх інвестыцый”, а таксама “базавым рынкам збыту і рэалізацыі беларускага капіталу”, падкрэсліў навуковы супрацоўнік Цэнтра постсавецкіх даследаванняў. Паводле яго даных, “аб’ём назапашаных расійскіх укладанняў у рэспубліцы ў 2023 годзе склаў 4,5 млрд долараў — амаль 30% ад усіх прамых замежных інвестыцый (ПЗІ)”. “У РФ засяроджана таксама амаль 86% (1,31 млрд долараў) беларускіх выходных ПЗІ”, — напісаў эксперт.

Прыходзька звярнуў увагу на прэферэнцыйнае крэдытаванне як адзін са спосабаў інвеставання ў эканоміку Беларусі з боку Расіі. “Найбольш яскравым прыкладам” ён назваў будаўніцтва Беларускай АЭС, “на стварэнне якой Расія вылучыла льготны крэдыт па стаўцы 3,3%, даўшы ў сакавіку 2023 года гадавую адтэрміноўку на яго пагашэнне”.

Акрамя таго, нагадаў аўтар артыкула, у лістападзе 2022 года РФ вылучыла Беларусі крэдыт на рэалізацыю праграм імпартазамяшчэння ў памеры 105 млрд расійскіх рублёў (1,31 млрд долараў), якія “ў 2023–2024 гадах павінны быць выдаткаваныя на рэалізацыю 23 праектаў, скіраваных на правядзенне адзінай прамысловай палітыкі з мэтай замяшчэння крытычнага імпарту”.

Партал “ЕЎРАZІЯ ЭКСПЕРТ” (выкарыстоўвае ў назве лацінскую літару Z, якая стала адным з сімвалаў расійскай агрэсіі ва Украіне) пазіцыянуе сябе як “інфармацыйна-аналітычнае выданне і аднайменны навуковы часопіс пра Еўразійскі рэгіён”. Зарэгістраваны Федэральнай службай РФ па наглядзе ў сферы сувязі, інфармацыйных тэхналогій і масавых камунікацый у верасні 2016 года.

Сузаснавальнікамі з’яўляюцца Дзяржаўны акадэмічны універсітэт гуманітарных навук і дырэктар Цэнтра навуковай дыпламатыі і перспектыўных акадэмічных ініцыятыў Інстытута міжнародных даследаванняў МДІМЗ МЗС РФ Вячаслаў Сутырын. Апошні таксама з’яўляецца кіраўніком арганізацыйнай групы Расійска-беларускага форуму па пытаннях бяспекі і супрацоўніцтва “Рубяжы Саюзнай дзяржавы”. Публікацыі на партале прысвечаныя “шырокаму спектру тэм, звязаных з еўразійскай інтэграцыяй”.