У “патрыятычнае выхаванне” ўцягнута “ўсё насельніцтва”, лічыць галоўны ідэолаг Мінабароны
6 снежня, Позірк. У 42 створаных у беларускім войску ваенна-патрыятычных клубах займаецца “больш за паўтары тысячы дзетак”, паведаміў памочнік міністра абароны па ідэалагічнай працы ва Узброеных сілах — начальнік галоўнага ўпраўлення ідэалагічнай працы Леанід Касінскі ў інтэрв’ю перад пачаткам расійска-беларускага экспертна-медыйнага форуму “Моладзь — за Саюзную дзяржаву”.
На яго думку, у Беларусі, “асабліва ў апошнія гады”, ёсць “попыт на патрыятызм, не толькі ў маладых людзей, але і ў людзей рознага ўзросту”. Гэтую з’яву ён звязаў з “шэрагам падзеяў, якія адбываюцца вакол нашай краіны, з тым ваенна-палітычным становішчам, якое складваецца ў свеце”. Як заявіў ідэолаг, у “праграме патрыятычнага выхавання насельніцтва” ўпор “зроблены ў асноўным на маладым пакаленні”, але ў працу на гэтым напрамку “ўцягнута ўсё насельніцтва Рэспублікі Беларусь”.
У дачыненні да Касінскага і яшчэ 21 высокапастаўленага беларускага вайскоўца 2 сакавіка 2022 года былі ўведзеныя санкцыі Еўрапейскага саюза з улікам іх ролі “ў працэсах прыняцця рашэнняў і стратэгічнага планавання, якія прывялі да ўдзелу Беларусі ў расійскай агрэсіі супраць Украіны”.
2 чэрвеня 2022 года міністр адукацыі Андрэй Іванец у эфіры праграмы АНТ “Маркаў. Нічога асабістага” адзначаў, што з 2021 года ў сярэдніх школах была ўведзена новая пасада — кіраўнік па ваенна-патрыятычным выхаванні. Пры гэтым, паводле яго слоў, формы такога выхавання “могуць быць самыя розныя”. “Напрыклад, нават пры вывучэнні матэматыкі для разліку аб’ёму конуса альбо плошчы конуса нашы маладыя педагогі дэманструюць, кажуць: Курган Славы — святое месца для нашай краіны, якое ўвасабляе той подзвіг савецкага народа, які быў здзейснены. Разлічыце, якую колькасць зямлі з усіх куткоў Савецкага Саюза прывезлі, каб збудаваць гэты фактычна абеліск і помнік, які мае нейкую вышыню, такі дыяметр. Гэта і ёсць выхаванне патрыятычнае на кожным уроку”, — сказаў Іванец.
Таксама ён прапанаваў на занятках па хіміі павышаць “гонар за нашыя нафтаперапрацоўчыя заводы”.
Іванец паведаміў аб загадзе Мінадукацыі, які вызначае памятныя даты і дзяржаўныя святы, падчас якіх ва ўсіх установах адукацыі, “пачынаючы ад устаноў дашкольнай адукацыі, летніх аздараўленчых лагераў”, будуць ушаноўваць дзяржаўныя сімвалы.
“Гэта ўзняцце нашага дзяржаўнага сцяга і выкананне гімна, — патлумачыў чыноўнік. — У 5-6 гадоў выхавальнік абавязаны быў знаёміць з дзяржаўнымі сімваламі дзяцей, гэта ў вучэбнай праграме закладзена. А ў 6-7 гадоў — выхоўваць пачуццё гонару”.
Таксама, паводле слоў міністра, на школьных дзённіках размешчаны QR-код для пераходу на платформу Патрыёт.by, на якой сабраны “ўсе матэрыялы па патрыятычным выхаванні”. “Нават калі школьнік засумуе дзесьці, седзячы, напрыклад, дома, — скануе QR-код і пераходзіць не ў “ЦікТок” або тэлеграм-канал, а на сапраўды годны сайт, які дазволіць яму ганарыцца сваёй краінай”, — апісаў Іванец сваё бачанне дзіцячага вольнага часу.