Прадстаўнікі МЗС краін Балтыі і Германіі абмеркавалі падтрымку дэмсіл Беларусі і сітуацыю з палітвязнямі
21 снежня, Позірк. Пытанні міжнароднай ізаляцыі Беларусі і Расіі сярод іншага абмяркоўваліся на кансультацыях дырэктараў па палітыцы ўсходняга суседства міністэрстваў замежных спраў Літвы, Латвіі, Эстоніі і Германіі, якія прайшлі на пачатку тыдня ў Вільнюсе.
“Адбыўся абмен думкамі аб абавязацельствах па забеспячэнні міжнароднай бяспекі Украіны, адказнасці Расіі, санкцыях ЕС супраць Расіі, выкарыстанні замарожаных расійскіх сродкаў і міжнароднай ізаляцыі Беларусі і Расіі”, — паведаміла 20 снежня прэс-служба літоўскага МЗС.
Прадстаўнікі знешнепалітычных ведамстваў “аднадушна пагадзіліся з неабходнасцю працягваць падтрымку дэмакратычных сіл Беларусі і актуалізаваць пытанні аб палітычных зняволеных”. “Важна забяспечыць, каб Беларусь заставалася на парадку дня Еўрапейскага саюза”, — гаворыцца ў паведамленні.
Краіны Балтыі і Германія “адзіныя ў асуджэнні працяглай агрэсіі Расіі супраць Украіны”. Дыпламаты абмеркавалі шляхі аказання дапамогі ўкраінскаму народу “ў супраціве і перамозе над агрэсарам”. Акрамя Украіны і Беларусі сустрэча тычылася пытанняў пашырэння ЕС, палітыкі Усходняга партнёрства, сітуацыі на Паўднёвым Каўказе і ў Цэнтральнай Азіі.
Беларусь і Літва разам змагаюцца з “імперскімі амбіцыямі Расіі і за агульную будучыню ў Еўрасаюзе”, заявіла дэмакратычны лідар Святлана Ціханоўская 14 снежня на брыфінгу па выніках камітэтскіх слуханняў у літоўскім сейме.
Палітык назвала вырашальнай падтрымку з боку Літвы. Яна падзякавала народу гэтай балтыйскай краіны за тое, што той “быў побач у такі цяжкі час і прыняў тысячы беларусаў, якія ратуюцца ад тэрору і рэпрэсій”.
Акрамя таго, яна заклікала літоўскія ўлады адмовіцца ад ідэі ўраўнаваць абмежавальныя меры ў дачыненні да беларусаў і расіян, паколькі “гэта менавіта тое, чаго хочуць Пуцін і Лукашэнка”.
