Міністэрства аховы здароўя вызначыла прычыны для зняцця пацыентаў з уліку маючых патрэбу ў замене буйных суставаў

13 верасня, Позірк. Міністэрства аховы здароўя ў інструкцыі аб парадку арганізацыі аказання меддапамогі тым, хто мае патрэбу ў замене буйных суставаў, вызначыла прычыны, па якіх пацыентаў будуць здымаць з уліку.

У дакуменце, які цытуе прэс-служба ведамства, указана, што гэта можа адбыцца ў выпадку няяўкі пацыента на працягу шасці месяцаў з даты атрымання ліста абвесткі, адмовы яго ад правядзення эндапратэзавання, выяўлення захворванняў, пры якіх замена супрацьпаказана, а акрыянне або дасягненне кампенсацыі па дадзеным захворванні не прагназуецца і г.д.

Інструкцыя вызначае парадак арганізацыі аказання меддапамогі пацыентам, якія маюць патрэбу ў эндапратэзаванні буйных суставаў, паказанні і супрацьпаказанні да замены, парадак і ўмовы абследавання ў перадаперацыйным перыядзе, парадак уліку пацыентаў і іх накіраванні для правядзення паўторнага, а таксама пазачарговай замены.

Уведзена паняцце “Лічбавая карта пацыента” — гэта “электронны дакумент, які змяшчае інфармацыю аб стане здароўя пацыента ў адсканаваным выглядзе”.

5 чэрвеня на тэлеканале ОНТ намеснік міністра аховы здароўя Юрый Горбіч заявіў, што чарга на эндапратэзаванне суставаў звязана з дэфіцытам матэрыялаў, а таксама парушэннем схем паставак.

Паводле яго слоў, Міністэрству аховы здароўя “пастаўлена задача — задача вельмі амбіцыйная, задача вельмі цяжкая”. “Мы будзем спрабаваць яе выканаць да канца гэтага года. Максімальна скараціць, зменшыць чаргу або ліквідаваць яе поўнасцю”, — сказаў чыноўнік.

Ліквідаваць да канца года чаргу Аляксандр Лукашэнка даручыў міністру аховы здароўя Дзмітрыю Піневічу 23 мая. Па словах кіраўніка ведамства, чарга складае 13,5 тыс. чалавек. Ён спаслаўся на тое, што “і ў мінулым годзе, і ў гэтым былі цяжкасці”. “Не будзем на гэтым спыняцца. Да канца года вы мне ўсе гэтыя суставы заменіце!” — запатрабаваў у адказ Лукашэнка. Піневіч заявіў, што “да канца года мы ўсё не заменім”.

У 2022 годзе ўлады ініцыявалі “справу артапедаў”: медыкі нібыта атрымлівалі незаконныя ўзнагароды ад прыватных кампаній, якія пастаўлялі некаторыя віды медыцынскіх вырабаў, у тым ліку суставы для імплантацыі. 35 артапедаў было затрымана.

Піневіч папрасіў у Лукашэнкі дазволу ўзяць на парукі абвінавачаных у хабарніцтве ўрачоў (пазней яны былі вызваленыя).

У верасні 2022 года Міністэрства аховы здароўя прыпыніла працу медцэнтра “Мерсі”, пабудаванага пры падтрымцы Сусветнага банка. Беларускі расследацыйны цэнтр (БРЦ) адзначаў, што некаторы час “Мерсі” быў адзінай медустановай у краіне, дзе было магчыма паставіць імпартны пратэз пры пратэзаванні тазасцегнавага сустава.