“Кіберпартызаны” заявілі пра ўзлом сайта дзяржаўнага інфармагенцтва БелТА

31 снежня, Позірк. Група ананімных хакераў, аб’яднаная ў ініцыятыву “Кіберпартызаны”, заявіла 31 снежня аб узломе сайта дзяржаўнага інфармацыйнага агенцтва БелТА.

Паведамляецца аб пашкоджанні ўнутранай сеткі і дамен-кантралёраў інфармагенцтва, аб спампоўцы 90 гігабайт дадзеных — унутраных дакументаў, бухгалтэрыі, асабістай інфармацыі пра супрацоўнікаў, архіва.

Пасля ўзлому на партале БелТА былі размешчаныя матэрыялы і фота пратэстнага зместу. Цяпер сайт не адчыняецца.

“Прапагандысты Беларускага тэлеграфнага агенцтва шкодзяць беларускаму народу нароўні з карнікамі з МУС і спецслужбаў Лукашэнкі. Усе гады дыктатуры яны атручваюць розумы беларусаў хлуснёй і маніпуляцыямі ва ўгоду тырану. За гэта мы наносім удар па кампутарнай сетцы БелТА, паралізуем працу вэб-сайтаў праўладнай прапаганды і знішчаем бэкапы”, — гаворыцца ў заяве “Кіберпартызан”.

“Мы пачалі кібератаку 29 снежня. Дата была спецыяльна абраная так, каб навагоднія святы ў прапагандыстаў “удаліся”. Атакаваць сетку пачалі проста з раніцы, калі супрацоўнікі толькі прыйшлі ў офіс БелТА і ўключылі кампутары”, — адзначае ініцыятыва.

Сцвярджаецца, што цяпер праца агенцтва “фактычна паралізаваная”, супрацоўнікі “спрабуюць выконваць задачы з хатніх кампутараў”, бо “рабочая тэхніка адмаўляецца працаваць, як мае быць”.

“Кіберпартызаны” адзначаюць, што супрацоўнікі БелТА “не выконваюць нават мінімальныя правілы кампутарнай бяспекі і інфармацыйнай гігіены” і, у прыватнасці, “карысталіся пірацкім софтам і сістэмамі”.

Паводле інфармацыі хакераў, кіраўніцтва дзяржагенцтва забараніла супрацоўнікам распавядаць пра кібератаку.

“Кіберпартызаны” — група ананімных хакераў, якая з’явілася ў верасні 2020 года. Вядомыя атакамі на сайты беларускіх сілавых структур, дзяржустаноў і СМІ, размяшчэннем у адкрытым доступе службовай і сакрэтнай інфармацыі.