Сайт дзяржагенцтва БелТА пасля ўзлому не адчыняецца з-за мяжы, але працуе ў Беларусі

3 студзеня, Позірк. Сайт дзяржаўнага інфармацыйнага агенцтва БелТА, які 31 снежня быў, паводле заявы групы ананімных хакераў з ініцыятывы “Кіберпартызаны”, ёю ўзламаны, па-ранейшаму не адчыняецца з-за мяжы.

З Беларусі сайт адчыняецца ў звычайным рэжыме. Мяркуючы па стужцы навін агенцтва, 31 снежня, у дзень узлому, перабой у працы нібыта склаў менш за 2,5 гадзіны. Пры гэтым канал агенцтва ў “Тэлеграме” не публікаваў спасылкі на навіны сайта ў той дзень.

31 снежня “Кіберпартызаны” заявілі аб узломе сайта дзяржаўнага інфармагенцтва.

Паведамлялася аб пашкоджанні ўнутранай сеткі і дамен-кантралёраў, аб спампоўцы 90 гігабайт даных — унутраных дакументаў, бухгалтэрыі, асабістай інфармацыі аб супрацоўніках, архіву.

Пасля ўзлому на партале БелТА былі размешчаны матэрыялы і фатаграфіі пратэстнага зместу.

“Прапагандасты Беларускага тэлеграфнага агенцтва шкодзяць беларускаму народу нароўні з карнікамі з МУС і спэцслужбаў Лукашэнкі. Усе гады дыктатуры яны атручваюць розумы беларусаў хлуснёй і маніпуляцыямі, каб дагадзіць тырану. За гэта мы наносім удар па кампутарнай сетцы БелТА, паралізуем працу вэб-сайтаў праўладнай прапаганды і знішчаем бэкапы”, — заявілі “Кіберпартызаны”.