Human Rights Watch: У 2023 годзе ўсё часцей палітвязні ў Беларусі ўтрымліваліся без сувязі са знешнім светам

11 студзеня, Позірк. “У Беларусі масавыя рэпрэсіі ў дачыненні да крытыкаў улады працягнуліся ў 2023 годзе”, гаворыцца ў штогадовай справаздачы міжнароднай праваабарончай арганізацыі Human Rights Watch, прысвечанай сітуацыі з выкананнем правоў чалавека ў свеце ў 2023 годзе.

Адзначаецца, што “на момант падрыхтоўкі агляду” (лістапад 2023 года) амаль 1,5 тыс. чалавек заставаліся ў зняволенні па палітычна матываваных абвінавачаннях”: “У іх ліку былі праваабаронцы, журналісты, адвакаты, апазіцыйныя палітыкі, дзеячы культуры, прафсаюзныя работнікі і актывісты. Улады ўсё часцей утрымлівалі палітвязняў інкамунікада (без сувязі са знешнім светам. — “Позірк”.), ужывалі катаванні і іншае недазволенае абыходжанне”.

“У лютым Упраўленне вярхоўнага камісара ААН па правах чалавека (УВКПЧ) зрабіла заяву аб сістэматычных, шырока распаўсюджаных і грубых парушэннях правоў чалавека ў краіне, указаўшы, што некаторыя могуць дасягаць ўзроўню злачынстваў супраць чалавечнасці”, — зазначаецца ў дакуменце.

У справаздачы прыводзяцца канкрэтныя факты арыштаў і затрыманняў меркаваных апанентаў рэжыму, рэпрэсій супраць праваабаронцаў, адвакатаў і журналістаў і ціску на вучняў.

Паводле сцвярджэння праваабаронцаў, у сувязі з гуманітарным крызісам на мяжы Беларусі з Еўрасаюзам на працягу года “мігранты, у тым ліку дзеці, па-ранейшаму знаходзіліся ў бязвыхадным становішчы на беларускім баку мяжы, падвяргаючыся сур’ёзным парушэнням з боку беларускіх службовых асоб і сутыкаючыся з рызыкамі для жыцця”.