Краіны Балтыі дамовіліся ўмацаваць межы з Беларуссю і Расіяй

19 студзеня, Позірк. Міністры абароны Латвіі, Літвы і Эстоніі ўхвалілі 19 студзеня канцэпцыю будаўніцтва абарончых збудаванняў на межах з Расіяй і Беларуссю, накіраваных на абмежаванне мабільнасці войскаў саперніка, паведамляецца на сайце Мінабароны Эстоніі.

Паводле слоў міністра абароны Эстоніі Ханна Пеўкура, будаўніцтва такіх збудаванняў з’яўляецца “старанна прадуманым праектам, неабходнасць якога выцякае з цяперашняй сітуацыі з бяспекай”. Паведамляецца, што канцэпцыя, апрача непасрэднага засяроджвання тэхнікі, боепрыпасаў і жывой сілы, прадугледжвае актыўнае выкарыстанне ландшафту прыгранічнай мясцовасці, стварэнне сеткі бункераў, а таксама пунктаў падтрымкі арміі і ліній размеркавання рэсурсаў.

Эстонскае ведамства зазначае, што канцэпцыя заснавана на рашэннях, прынятых на Мадрыдскім саміце НАТО 2022 года, у якіх падкрэслівалася, што саюзнікі павінны быць гатовы абараніць тэрыторыю сваіх краін з першага метра, для чаго неабходна распрацаваць новыя рэгіянальныя планы абароны.

Таксама ў ходзе сустрэчы міністры падпісалі пагадненне аб намерах адносна сістэм залпавага агню HIMARS, мэтай якога з’яўляецца стварэнне асновы для сумеснага выкарыстання згаданай сістэмы ўзбраення як у мірны, так і ў ваенны час.