У дзясятую гадавіну гібелі Жызнеўскага Ціханоўская заклікала “ніколі не забываць” беларусаў, якія загінулі ва Украіне

22 студзеня, Позірк. “Мы ніколі не павінны забываць многіх беларусаў, якія ахвяравалі сваім жыццём дзеля свабоды Украіны, — напісала дэмакратычны лідар Святлана Ціханоўская ў “X” (былы “Твітар”) у дзясятую гадавіну з дня гібелі беларуса Міхаіла Жызнеўскага.

22 студзеня 2014 года ў цэнтры Кіева загінулі першыя героі “Рэвалюцыі годнасці” і Нябеснай сотні. Сярод іх быў беларус Міхаіл Жызнеўскі. Жызнеўскі быў забіты раніцай на вуліцы Грушэўскага. Хто забіў Жызнеўскага да гэтага часу невядома.

Міхаіл Жызнеўскі з’ехаў з Гомеля ва Украіну ў 17 гадоў, з’яўляўся актыўным членам украінскай арганізацыі УНА-УНСО, з самага пачатку ўдзельнічаў у Майдане, займаўся аховай тэрыторыі плошчы.

Жызнеўскі пасмяротна стаў Героем Украіны, быў удастоены ордэна Герояў Нябеснай Сотні. Пахаваны на радзіме.

З пачатку поўнамаштабнага нападу Расіі на Украіну ў 2022 годзе загінула каля трох дзясяткаў беларускіх добраахвотнікаў, якія адбівалі расійскую агрэсію.