31 студзеня, Позірк. Міністр абароны Віктар Хрэнін, які здзяйсняе візіт на Кубу, узнагароджаны ордэнам “Плайя Хірон”, зацверджаным прэзідэнтам гэтай дзяржавы.
Як адзначае прэс-служба Мінабароны, гэты ордэн уручаецца грамадзянам Кубы і замежнікам “за выдатны ўнёсак у барацьбе супраць імперыялізму і рэакцыйных сіл, за каштоўны ўклад у будаўніцтва ўзброеных сіл і за высокія дасягненні ў імя міру і прагрэсу чалавецтва”.
“Перакананы, у першую чаргу гэта ацэнка штодзённай ратнай працы ўсіх вайскоўцаў беларускай арміі. Я ўсведамляю той высокі ўзровень адказнасці, які ўсклала на мяне гэтая ўзнагарода. Хачу запэўніць, што мы прыкладзем усе свае сілы для забеспячэння міру і бяспекі”, — заявіў Хрэнін.
Паведамляецца, што падчас візіту ён наведаў акадэмію Рэвалюцыйных узброеных сіл Кубы імя Генерала Максіма Гомеса, дзе выступіў з лекцыяй.
“Некаторым слухачам, якія вучыліся ў Мінску, пашчасціла атрымаць асабістае запрашэнне ад кіраўніка ваеннага ведамства наведаць Беларусь, каб успомніць курсанцкія гады”, — адзначае прэс-служба ведамства.
30 студзеня Хрэнін і міністр Рэвалюцыйных узброеных сіл Кубы Альвара Лопес М’ера падпісалі дакументы аб двухбаковым ваенным супрацоўніцтве.
Падкрэслівалася, што ваенныя чыноўнікі адзначылі “падабенства пазіцый дзяржаў на міжнароднай арэне, моцныя гістарычныя сувязі і агульныя падыходы да ацэнкі ключавых праблем сучаснасці”.
Хрэнін адправіўся на Кубу 27 студзеня. Паводле слоў міністра, гэта дзяржава з’яўляецца для Беларусі “важным партнёрам на міжнароднай арэне і стратэгічным саюзнікам у Заходнім паўшар’і”, а краіны, нягледзячы на геаграфічную аддаленасць “і некаторыя культурныя адрозненні, <…> маюць падобныя рысы”. У прыватнасці, гэта “імкненне да незалежнасці і сацыяльнай справядлівасці, раўнапраўнага супрацоўніцтва з іншымі дзяржавамі”.
“Для абаронных ведамстваў важна выбудоўваць такія адносіны, каб яны адказвалі запытам нашых людзей, каб людзі адчувалі сябе ў бяспецы”, — заявіў міністр абароны Беларусі.
