Латушка: Вытворчасць музычных інструментаў на фабрыцы ў Барысаве не мае інвестыцыйнага сэнсу

4 лютага, Позірк. Вытворчасць музычных інструментаў на прадпрыемстве ў Барысаве “не мае інвестыцыйнага сэнсу”, заявіў 4 лютага кіраўнік Народнага антыкрызіснага ўпраўлення, экс-міністр культуры Павел Латушка.

Палітык адзначыў, што ў перыяд кіраўніцтва Мінкультам (2009–2012 гг.) Аляксандр Лукашэнка даручаў яму разам з кіраўніцтвам Мінскага аблвыканкама “вывучыць магчымасць аднаўлення [вытворчасці] музычных інструментаў на Барысаўскай фабрыцы музычных інструментаў”.

“Разлікі аднаўлення вытворчасці <…> беларускіх піяніна <…> паказалі, што акупнасць укладзеных сродкаў настане — і тут увага — праз 32 гады”, — сказаў Латушка.

“Тады мы спрабавалі праз амбасаду Беларусі за мяжой прыцягнуць замежных інвестараў з Японіі, з Паўднёвай Карэі, але памятаю, што ўсе адказы, якія паступілі ў той момант у той час у адрас Міністэрства культуры, казалі: няма сэнсу інвеставаць у барысаўскую фабрыку, бо рынак вельмі маленькі”, — падкрэсліў палітык.

Кіраўнік НАУ нагадаў, што ў 2006 годзе вытворчасць фартэпіяна спынілася, а ў 2018 годзе Барысаўская фабрыка музычных інструментаў прызнана банкрутам і знаходзіцца ў стане ліквідацыі.

Развіваць вытворчасць музычных інструментаў, а таксама лыжаў даручыў Лукашэнку кіраўніку свайго Кіраўніцтва справамі Юрыю Назараву 2 лютага.

“Наша нацыя музычная, адукаваная ў гэтым плане, а мы ў асноўным купляем імпартнае, — заявіў ён. — Нешта паспрабавалі ў Барысаве ўзнавіць быццам бы, на гэтым і заглухла. Гэта, канешне, пытанне дзяржаўнае, не толькі Кіраўніцтва справамі, але табе як дасведчанаму чалавеку трэба паглядзець і на дзяржаўныя арганізацыі, якія павінны падключыцца і зрабіць максімум, у прыватнасці для развіцця гэтага кірунку”.

Упершыню выпускаць музычныя інструменты і лыжы Лукашэнка запатрабаваў у 2018 годзе.

Фабрыка піяніна была створана ў Барысаве на базе лесазавода ў 1935 годзе. Асноўным відам прадукцыі былі піяніна “Беларусь”. Пазней выпускаліся гітары і цымбалы. У 1976 годзе пераўтворана ў галаўное прадпрыемства Барысаўскага вытворчага аб’яднання музычных інструментаў “Белмузпрам”, у 1997-м — у ААТ “Барысаўскае прадпрыемства музычных інструментаў”.

Інструменты не выпускаюцца з 2006 года, нерухомая маёмасць прадпрыемства часткова распрададзена, часткова знесена.

У 2018 годзе на новым прадпрыемстве “Фабрыка фартэпіяна” ў Мінску адноўлена вытворчасць піяніна “Беларусь”.