Пашырэнне правоў вайскоўцаў заклікана стварыць атмасферу страху і дэпрэсіі ў Беларусі — Сахашчык

6 лютага, Позірк. Указ Аляксандра Лукашэнкі, які пашырае правы вайскоўцаў, з’яўляецца “чарговым лагічным этапам стварэння атмасферы абсалютнага страху і дэпрэсіі ў Беларусі”, такое меркаванне выказаў прадстаўнік Аб’яднанага пераходнага кабінету (АПК) па абароне і нацыянальнай бяспецы Валерый Сахашчык.

Разам з тым, лічыць ён, “гэты і іншыя падобныя крокі Лукашэнку ніяк не дапамогуць, бо толькі ўзмацняюць напружанне і крызіс у краіне”.

Лукашэнка, на думку Сахашчыка, “спрабуе прадугледзець усё і запалохаць людзей па максімуме ў сувязі з электаральнымі кампаніямі ў 2024 і 2025 гадах”, бо пасля прэзідэнцкай кампаніі 2020-га, якая выклікала маштабныя пратэсты, “больш не верыць у спакойныя выбары”.

Прадстаўнік АПК мяркуе, што Лукашэнка баіцца не толькі апазіцыі, “але і Крамля, якому сам стварыў цудоўныя ўмовы для правакацый у краіне”. 

Указ № 37 ад 1 лютага 2024 года (афіцыйна апублікаваны 3 лютага) зацвердзіў змены ў Статут унутранай службы Узброеных сіл.

Згодна з карэкціроўкай п. 11, вайскоўцы “пры выкананні ўскладзеных на іх задач” маюць права “прымяняць фізічную сілу, спецыяльныя сродкі, баявую і спецыяльную тэхніку, ужываць і выкарыстоўваць зброю з улікам існуючай абстаноўкі, характару злачынства, адміністрацыйнага правапарушэння і асобы правапарушальніка, кіруючыся патрабаваннямі агульнавайсковых статутаў”. Пры гэтым выключана згадка пра неабходнасць рабіць папераджальны стрэл перад выкарыстаннем зброі.

У ранейшай рэдакцыі статута вайскоўцам давалася права “прымяняць фізічную сілу, спецыяльныя сродкі, зброю, баявую і спецыяльную тэхніку, калі іншымі спосабамі выкананне ўскладзеных на іх задач не ўяўляецца магчымым”.