Галоўчанка абвінаваціў “двудушных брусэльскіх чыноўнікаў” у парушэнні паставак лекаў у Беларусь
19 лютага, Позірк. “Брусэльскія чыноўнікі, займаючы двудушную пазіцыю, дэ-юрэ абмежавалі, а дэ-факта істотна абцяжарылі пастаўкі ў Беларусь лекавых сродкаў і медыцынскага абсталявання”, — заявіў 19 лютага прэм’ер-міністр Раман Галоўчанка на сустрэчы ў Мінску з Міларадам Додзікам, прэзідэнтам Рэспублікі Сербскай (аўтаномія ў складзе Босніі і Герцагавіны).
Паводле слоў Галоўчанкі, відэа выступу якога апублікавана ў тэлеграм-канале ўрада, “мы з гэтым справіліся, перабудавалі нашыя каналы закупак, зрабілі значны крок наперад ва ўласнай вытворчасці медыцынскіх вырабаў, лекавых прэпаратаў і гатовыя супрацоўнічаць па ўсіх напрамках у медыцынскай сферы з Рэспублікай Сербскай”.
Асобна чыноўнік падкрэсліў гатоўнасць развіваць двухбаковае супрацоўніцтва ў галіне “высокатэхналагічнай стаматалагічнай дапамогі”.
На сустрэчы размова таксама ішла аб арганізацыі паставак у Рэспубліку Сербскую беларускай пасажырскай тэхнікі і нарошчванні экспарту трактароў.
Беларускія ўлады не ўпершыню абвінавачваюць краіны Захаду ў парушэнні імпарту медыкаментаў. Аб палітычным характары спынення паставак заявіў начальнік аддзела знешніх сувязяў Міністэрства аховы здароўя Анатоль Грушкоўскі 24 студзеня ў Жэневе на пасяджэнні 154-й сесіі выканкама Сусветнай арганізацыі аховы здароўя (СААЗ).
Паводле слоў чыноўніка, Дзяржаўнае агенцтва па рэгуляванні лекаў і прадукцыі аховы здароўя Вялікабрытаніі зацягвала працэдуру выдачы ліцэнзіі на экспарт у Беларусь таблетак марфіну. Акрамя таго, ён абвінаваціў шведскую кампанію Molnlycke Health Care у адмове пастаўляць у Беларусь перавязачныя матэрыялы, неабходныя для паліятыўнага лячэння дзяцей. Польская кампанія Tarchomin Pharmaceutical Works Polfa S.A., сказаў ён, адмовілася пастаўляць лекі для лячэння эпілепсіі і саматычных захворванняў.
Брытанская кампанія Atnahs Pharma UK Limited, паводле яго слоў, спыніла экспартаваць на беларускі рынак прэпараты для лячэння астэапарозу, а фінская Orion Corporation — для лячэння хваробы Паркінсона і розных формаў раку.
Падобныя факты, на яго думку, “пацвярджаюць, што палітычна матываваныя санкцыі прыводзяць да блакавання доступу да шэрагу крытычна важных медыкаментаў для найбольш уразлівых: дзяцей, пажылых людзей, асоб, якія пакутуюць ад анкалагічных і іншых цяжкіх захворванняў”, а гэта не суадносіцца “з дэкларуемымі заходнімі краінамі “гуманітарнымі выключэннямі” пры рэалізацыі санкцыйнай палітыкі”.
11 лютага кіраўнік Народнага антыкрызіснага ўпраўлення Павел Латушка заявіў, што Захадам не ўводзіліся санкцыі на лекавыя прэпараты і вырабы медыцынскага прызначэння для Беларусі.
Шматлікія кампаніі, сярод іх ёсць і фармакалагічныя, па ўласнай ініцыятыве адмаўляюцца ад супрацоўніцтва з Мінскам, сказаў палітык.
“Але прычынай гэтага з’яўляюцца не эканамічныя санкцыі, а таксічнасць рэжыму Лукашэнкі, з якім міжнародны бізнес не хоча мець спраў з-за масавых рэпрэсій, дзеянняў рэжыму, якія падрываюць міжнародную бяспеку, такіх як захоп грамадзянскага самалёта, справакаваны рэжымам міграцыйны крызіс, але галоўным чынам — з-за ўдзелу рэжыму ў ваеннай агрэсіі супраць Украіны”, — сказаў Латушка.
Паводле дадзеных Еўрастата, на якія ён спаслаўся, Беларусь за апошнія восем гадоў штогод павялічвае закупкі еўрапейскай фармацэўтычнай прадукцыі: “Такім чынам, нават нібыта ва ўмовах аднабаковых санкцый, на якія спрабуюць скардзіцца нелегітымныя прадстаўнікі Беларусі ў ААН, імпарт лекаў пастаянна расце”.
