Зборы тэрабароны будуць праводзіцца да 5 красавіка ў Воранаўскім раёне на мяжы з Літвой

14 сакавіка, Позірк. Навучальныя зборы з ваеннаабавязанымі тэрытарыяльных войскаў праходзяць 14 сакавіка — 5 красавіка пад кіраўніцтвам старшыні Воранаўскага раёна (Гродзенская вобласць), паведамляе прэс-служба Міністэрства абароны.

Воранаўскі раён мяжуе з Варэнскім і Шальчынінкайскім раёнамі Літвы.

Паводле інфармацыі ваеннага ведамства, мэта збораў заключаецца ў тым, каб “падвысіць навыкі” чыноўнікаў райвыканкама “ў фармаванні вайсковых часцей тэрытарыяльных войскаў”, а ваеннаабавязаных — “у выкананні задач па прызначэнні”.

За тры тыдні плануецца адпрацаваць “прыём ваеннаабавязаных тэрытарыяльных войскаў і іх усебаковае забеспячэнне”, аднавіць навыкі каманднага складу “ў кіраванні падначаленымі”, падрыхтаваць ваеннаабавязаных да “выканання задач у адпаведнасці з ваенна-ўліковымі спецыяльнасцямі і службовым прызначэннем”, патрэніравацца ў “фармаванні, падрыхтоўцы і прымяненні атрада народнага апалчэння”.

Зборы, як сцвярджаецца, маюць “планавы характар”.

Раней паведамлялася, што з 12 сакавіка па 5 красавіка праводзіцца першы этап комплекснай праверкі органаў упраўлення тэрабароны Гомельскай вобласці. Тэрытарыяльныя войскі плануецца разгарнуць у Кармянскім і Рагачоўскім раёнах.

6 сакавіка прайшла трэніроўка па кіраванні працэсам фармавання тэрытарыяльных войскаў Магілёўскай вобласці. У Віцебскай вобласці заняткі па мабілізацыйнай гатоўнасці тэрытарыяльных войскаў адбыліся 4 сакавіка. 27 лютага — 1 сакавіка камісія Генштаба правяла праверку органаў кіравання тэрабароны Мінска.

Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.

Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама ваеннымі камісарамі са сталіцы і рэгіёнаў 26 траўня 2023 года ў Гомелі заявіў, што тэрытарыяльная абарона “з сістэмы, якая забяспечвае, трансфармуецца ў паўнавартасную баявую”.

3 чэрвеня 2022 года Лукашэнка заявіў, што з улікам “негатыўнага ўкраінскага досведу” прыняў рашэнне “на ўсялякі выпадак пры кожным сельскім савеце мець <…> народнае апалчэнне, гэтую групку людзей”. У выпадку ваенных дзеянняў, упэўнены ён, атрады апалчэнцаў “могуць трансфармавацца ў партызанскі рух і стаць рэзервам для тэрытарыяльнай абароны”.