Мытны камітэт папярэдзіў аб уведзеных Польшчай абмежаваннях для аўто з аб’ёмам рухавіка больш за 1,9 л

25 сакавіка, Позірк. Мытны камітэт Беларусі 25 сакавіка звярнуў увагу кіроўцаў на абмежаванні, уведзеныя Польшчай пры перасячэнні мяжы.

Адзначаецца, што абмежаванні тычацца аўтамабіляў еўрапейскіх марак з аб’ёмам рухавіка больш за 1,9 літра, якія “прызначаныя для экспарту ў Беларусь і Расію”. Такія аўтамабілі польскія службы не прапускаюць праз мяжу.

Са спасылкай на шэраг СМІ камітэт паведаміў, што “паводле папярэдняй інфармацыі з інтэрнэт-рэсурсаў, поўнае блакаванне ўсіх машын з маторам 1,9 літра і вышэй працягнецца да 1 красавіка”.

“Польскія мытнікі разварочваюць аўто, якія падпадаюць пад пэўныя крытэрыі, уладальнікі якіх не могуць даказаць, што транспартныя сродкі ідуць транзітам і не будуць прададзеныя ў Беларусі і Расіі”, — заявілі ў ведамстве.

Раней шэраг сродкаў масавай інфармацыі паведаміў, што польскія мытнікі не выпускаюць у Беларусь аўтамабілі, аб’ём рухавіка якіх перавышае названыя параметры. Такая інфармацыя пачала распаўсюджвацца ў медыя 22 сакавіка са спасылкай на кіроўцаў і відавочцаў. У публікацыях кіроўцы скардзіліся на вялікія чэргі на мяжы.

Польскі бок аб уведзеных абмежаваннях не паведамляў.

Пасля вынясення палітычна матываванага прысуду журналісту 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).

Цяпер на польска-беларускай мяжы дзейнічае толькі пункт пропуску Цярэспаль (Брэст).