Выпускнікі ваенна-патрыятычных класаў могуць паступаць без экзаменаў у ВНУ на ваенныя спецыяльнасці

26 сакавіка, Позірк. Выпускнікі профільных вайскова-патрыятычных класаў могуць паступаць без іспытаў ва ўніверсітэты на ваенныя спецыяльнасці, вынікае з пастановы Савета міністраў № 197 ад 21 сакавіка.

Гаворка пра Ваенную акадэмію, вайсковыя факультэты БДУ (на спецыяльнасці “радыяцыйная, хімічная і біялагічная абарона”, “геаінфармацыйныя сістэмы”) і БДУІР (“сістэмы і сеткі інфакамунікацый”, “радыёсістэмы і радыётэхналогіі”), вайскова-тэхнічныя факультэты БНТУ (“эканоміка і кіраванне”, “эксплуатацыя наземных транспартных і тэхналагічных машын і комплексаў”) ды інш.

Выпускнікоў профільных класаў педагагічнай накіраванасці возьмуць без экзаменаў у педагагічныя ВНУ, інжынернай накіраванасці — у тэхнічныя ВНУ на інжынерныя спецыяльнасці. З той жа аналогіі на адпаведныя спецыяльнасці без іспытаў змогуць паступаць выпускнікі профільных класаў аграрнай і спартыўна-педагагічнай накіраванасці.

Паводле даных Мінадукацыі, у Беларусі каля 4 тыс. дзяцей вучацца ў профільных класах вайскова-патрыятычнай накіраванасці.

На падвышаным узроўні вывучаюцца матэматыка і фізіка, матэматыка і гісторыя Беларусі, хімія і біялогія, хімія і матэматыка, грамадазнаўства і замежная мова, геаграфія і матэматыка, замежная мова і матэматыка, фізічная культура і біялогія.

Абавязковым у такіх класах з’яўляецца факультатыў “Гатовы Радзіме служыць!” або “Юны пагранічнік”.

Профільныя класы з’явіліся ў 2015 годзе.