На паўночным захадзе складанае становішча, напружанасць можа вырасці, сцвярджае камандуючы ПЗАК
Камандуючы ПЗАК Аляксандр Навуменка
26 сакавіка, Позірк. Пра складаную абстаноўку, якая мае тэндэнцыю да “нарастання напружанасці” далажыў Аляксандру Лукашэнку 26 сакавіка ў Ашмянскім раёне (Гродзенская вобласць) камандуючы Паўночна-заходнім аператыўным камандаваннем Узброеных сіл Аляксандр Навуменка.
Паводле яго слоў, якія прыводзіць прэс-служба Міністэрства абароны, супраць Беларусі вядзецца паветраная выведка. У сярэднім фіксуецца “4–5 самалёта-вылетаў выведвальнай авіяцыі краін НАТО” на суткі, сцвярджае военачальнік.
Паводле яго слоў, цяпер на паўночна-заходнім аперацыйным напрамку (ПЗАН) “базуюцца 132 баявыя самалёты са складу авіяцыйнай групоўкі альянсу”.
Навуменка заявіў, што “паблізу мяжы Беларусі на сумежных тэрыторыях” узводзяцца інжынерныя канструкцыі — супрацьтанкавыя равы, агнявыя пазіцыі, папаўняюцца склады матэрыяльна-тэхнічных сродкаў і боепрыпасаў.
На гэтым напрамку “сумежны бок узмацніў ахову дзяржмяжы”, дадаў ён.
“Агульная колькасць сіл, якія прыцягваюцца там да аховы беларускага ўчастка дзяржаўнай мяжы, складае каля 3,2 тысячы чалавек, у тым ліку ў Літве — да 2,8 тысячы чалавек, у Латвіі — да 500”, — падкрэсліў Навуменка. Военачальнік дадаў, што колькасць вайсковых кантынгентаў краін НАТО, якія знаходзяцца на тэрыторыі краін Балтыі “ў рамках рашэння розных задач”, складае да 7,7 тыс. чалавек.
Цяпер на тэрыторыі шэрагу краін, уключаючы Літву і Польшчу, праводзяцца вучэнні “Квадрыга-2024”, сказаў Навуменка. У вучэннях на літоўскім палігоне Пабрадзе (15 км ад мяжы з Беларуссю) сканцэнтраваныя пяхотны і механізаваны батальёны Германіі і танкавы батальён ЗША.
Пры гэтым батальёны на палігоне Пабрадзе, паводле яго слоў, могуць быць задзейнічаныя для “правядзення правакацыйных дзеянняў паблізу ад дзяржаўнай мяжы з задзейнічаннем дыверсійна-выведвальных груп і незаконных узброеных фарміраванняў”.
Лукашэнка на сустрэчы з вайскоўцамі ў Ашмянскім раёне загадаў знішчаць усіх парушальнікаў мяжы
26 сакавіка, Позірк. У выпадку парушэння мяжы вайскоўцы і пагранічнікі павінны дзейнічаць жорстка, заявіў Аляксандр Лукашэнка 26 сакавіка ў раёне размяшчэння танкавага батальёна ў Ашмянскім раёне Гродзенскай вобласці (мяжуе з Літвой). “Публічна скажу: любая правакацыя павінна спыняцца ўзброеным шляхам, — цытуе Лукашэнку …
