17 красавіка, Позірк. На пасаду генеральнага дырэктара кампаніі МТС прызначаны Уладзімір Козыр, кандыдатуру якога зацвердзіў агульны сход удзельнікаў СТАА “Мабільныя Тэлесістэмы”, паведамляе прэс-служба мабільнага аператара.
Адзначаецца, што Козыр “мае вялікі вопыт, высокую кваліфікацыю і навыкі, якія дазваляюць паспяхова рэалізоўваць стратэгічныя задачы і праекты”. Доўгі час працаваў па напрамках эканомікі і сувязі. Да прыходу ў МТС займаў кіруючыя пасады ў праваахоўных органах Рэспублікі Беларусь.
У ліпені 2020 года Козыр быў прызначаны на пасаду начальніка ўпраўлення Камітэта дзяржаўнай бяспекі па Мінску і Мінскай вобласці, да гэтага працаваў начальнікам аператыўна-пошукавага ўпраўлення КДБ.
Козыр нарадзіўся ў 1970 годзе ў в. Савічы Калінкавіцкага раёна Гомельскай вобласці. У 1993 годзе скончыў Санкт-Пецярбургскі механічны інстытут (Расія), у 2019-м — Акадэмію кіравання пры прэзідэнце.
З 2021 года МТС кіраваў Уладзіслаў Андрэйчанка — сын былога старшыні Палаты прадстаўнікоў Уладзіміра Андрэйчанкі. Ён пакінуў сваю пасаду некалькі дзён таму.
МТС пачаў сваю працу ў Беларусі 27 чэрвеня 2002 года. На сёння кампанія — найбуйнейшы правайдэр тэлекамунікацыйных паслуг і лічбавых рашэнняў у Беларусі па колькасці абанентаў, якіх 5,7 млн. Мабільная сувязь МТС ахоплівае больш за 98% тэрыторыі краіны, на якой пражывае 99,90% насельніцтва Беларусі.
