24 красавіка, Позірк. Аўтобус Гданьск — Мінск з беларускімі нумарнымі знакамі раніцай 24 красавіка ў раёне горада Седльцэ (Мазавецкае ваяводства Польшчы) вылецеў з дарогі ў кювет, дзе перавярнуўся на бок і стукнуўся ў дрэва лабавым шклом. У аўтобусе знаходзілася 15 чалавек, сямёра з іх атрымалі траўмы, паведаміў Tygodnik Siedlecki.
“Па папярэдніх дадзеных, кіроўца беларускага аўтобуса на павароце дарогі па невядомых прычынах не справіўся з кіраваннем, выехаў у кювет і ўрэзаўся ў дрэва. Сем чалавек з траўмамі дастаўлены ў бальніцы. Вадзіцелі былі цвярозыя. На месцы працягваюць працаваць супрацоўнікі паліцыі”, — цытуе выданне прэс-сакратара паліцыі Седльцэ Эвеліну Радамыску.
У МЗС Беларусі дзяржаўным СМІ паведамілі, што ў выніку аварыі “7 з 14 беларусаў, якія знаходзіліся ў аўтобусе, дастаўлены ў шпіталь з лёгкімі траўмамі, яшчэ 7 чалавек чакаюць іншага аўтобуса для працягу руху па маршруце”.
“Амбасада Беларусі ў Польшчы ўдакладняе абставіны здарэння, дыпламаты гатовы аказаць неабходную консульска-прававую дапамогу”, — паведаміла ведамства.
