З 1 траўня вырасце бюджэт пражытачнага мінімуму

24 красавіка, Позірк. Бюджэт пражытачнага мінімуму (БПМ) у сярэднім на душу насельніцтва з 1 траўня па 31 ліпеня 2024 будзе раўняцца 418,73 рубля, вынікае з пастановы Міністэрства працы і сацыяльнай абароны.

Такім чынам, у сярэднім на душу насельніцтва новы памер БПМ вырасце на 2,9% (з 1 лютага 2024 года — 406,74 рубля).

Паводле згаданай пастановы, для працаздольнага насельніцтва БПМ у найбліжэйшыя месяцы будзе складаць 448,99 рубля; пенсіянераў — 303,03; дзяцей ва ўзросце да трох гадоў — 264,93, ва ўзросце ад трох да шасці — 354,32, ад шасці да васемнаццаці — 413,07.

Ад велічыні бюджэту пражытачнага мінімуму залежаць у тым ліку дапамога сем’ям, якія выхоўваюць дзяцей, сацыяльныя пенсіі, павышэнні і даплаты да пенсій для асобных катэгорый пенсіянераў, дапамога па догляду за інвалідам першай групы альбо за асобай, якая дасягнула 80-гадовага ўзросту.