8 траўня, Позірк. Пастаянныя прадстаўнікі 27 краін ЕС абмяркоўваюць 8 траўня пашырэнне санкцый супраць Беларусі, якая з’яўляецца “практычна інтэграванай у Расію васальнай дзяржавай Крамля”, паведамляе выданне Politico.
Адзначаецца, што Еўракамісія прапануе абмежаваць беларускі экспарт золата, нафты, газу і алмазаў. Мяркуецца, што кампаніям з краін ЕС будзе забаронена прадаваць Беларусі прадметы раскошы, марское навігацыйнае абсталяванне, а таксама тавары і тэхналогіі, якія выкарыстоўваюцца ў нафтагазавай прамысловасці.
Паводле інфармацыі выдання, разглядаецца забарона еўрапейскім кампаніям аказваць паслугі Беларусі, таксама магчыма пашырэнне спектру забароненых для паставак у краіну тавараў падвойнага прызначэння.
Пры гэтым паведамляецца, што паколькі Беларусь з’яўляецца буйным экспарцёрам калійных угнаенняў і некаторых харчовых тавараў, асобныя краіны ЕС асцерагаюцца рэзкага росту цэн на прадукты харчавання ў трэціх краінах у выпадку поўнай блакіроўкі адпаведнага беларускага экспарту. Аднак, паводле даных выдання, Еўракамісія лічыць, што санкцыі ў дачыненні да Беларусі не паўплываюць на пастаўкі пшаніцы або угнаенняў у “найбольш уразлівыя трэція краіны”.
18 красавіка Еўрапейскі савет ухваліў увядзенне пошлін на ўвоз у ЕС збожжавых, алейных культур і прадуктаў іх перапрацоўкі з Расіі і Беларусі, уключаючы пшаніцу, кукурузу і сланечнікавы шрот.
