Павялічана мінімальная колькасць супрацоўнікаў у ацэначных арганізацыях

27 чэрвеня, Позірк. З двух да пяці павялічана мінімальная колькасць супрацоўнікаў у ацэначных арганізацыях у адпаведнасці з падпісаным 27 чэрвеня Аляксандрам Лукашэнкам указам № 266.

Пры гэтым для арганізацый, якія ажыццяўляюць экспертызу дакладнасці ацэнкі, уведзены дадатковыя патрабаванні аб наяўнасці ў штаце не менш як двух экспертаў-ацэншчыкаў і аб ажыццяўленні ацэначнай дзейнасці не менш як шэсць гадоў. Гэта, па паведамленні прэс-службы Лукашэнкі, “дазволіць павысіць якасць паслуг за кошт выкарыстання калектыўнага вопыту”.

Дакументам устаноўлены мінімальныя памеры статутнага фонду для ацэначных арганізацый у памеры не менш як 50 тыс. рублёў, а для экспертных — 100 тыс., што “будзе з’яўляцца гарантыяй забеспячэння іх фінансавай устойлівасці, патэнцыяльнай крыніцай выплаты імі пры неабходнасці кампенсацыі магчымага ўрону”.

У адпаведнасці з указам ад 13 кастрычніка 2006 года нумар 615 “Аб ацэначнай дзейнасці ў Рэспубліцы Беларусь”, у які ўнесены змяненні, рэестр ацэншчыкаў вядзецца Дзяржаўным камітэтам па маёмасці. Аператарам дзяржаўнай інфармацыйнай сістэмы “Дзяржаўны рэестр ацэншчыкаў” з’яўляецца ГУП “Нацыянальнае кадастравае агенцтва”.