Пад коламі цягніка ў Мінскай вобласці загінула два чалавекі — яны перасоўваліся на матацыкле

14 ліпеня, Позірк. “Пара байкераў” загінула раніцай 14 ліпеня пад коламі цягніка ў Стаўбцоўскім раёне (Мінская вобласць), паведамляе прэс-служба Следчага камітэта.

Сутыкненне, паводле звестак ведамства, здарылася на нерэгуляваным пешаходным пераходзе чыгуначнай станцыі “Коласава”, смяротныя траўмы атрымалі мужчына і жанчына.

“Яны пераязджалі на байку гэты пераход перад электрацягніком”, — удакладнілі ў СК.

Сцвярджаецца, што, “нягледзячы на гучны гукавы сігнал і экстранае тармажэнне, якія ўжыў машыніст, прадухіліць наезд не ўдалося”.

На месцы здарэння працавала следча-аператыўная група.

“Усе абставіны здарэння будуць устаноўленыя Стаўбцоўскім раённым аддзелам падчас праверкі. Асаблівую ўвагу следчыя нададуць прычынам і ўмовам, якія спрыялі трагедыі”, — гаворыцца ў паведамленні.