Беларускіх дыпламатаў, якія працуюць за мяжой, “пагрузяць у працэсы, што адбываюцца ў краіне”

15 ліпеня, Позірк. “Грамадска-палітычны пласт мерапрыемстваў” запланавана правесці 15–19 ліпеня ў рамках семінара для кіраўнікоў дыпламатычных прадстаўніцтваў і консульскіх устаноў Беларусі, заявіў на яго адкрыцці міністр замежных спраў Максім Рыжанкоў.

Паводле яго слоў, якія прыводзіць прэс-служба МЗС, гэтыя мерапрыемствы будуць прысвечаныя ў тым ліку “інфармацыйнай бяспецы, канстытуцыйнаму будаўніцтву ў Беларусі, захаванню гістарычнай праўды”.

“Дыпламатычны корпус праводзіць большую частку свайго працоўнага часу за мяжой, таму вельмі важна пагрузіць калег у тыя працэсы, якія праходзяць у нашай краіне, праз дыялог з адмыслоўцамі — экспертамі ў сваіх галінах”, — заявіў чыноўнік.

Рыжанкоў лічыць, што штогадовае правядзенне гэтага семінара дае магчымасць “падтрымліваць на высокім актуальным узроўні дасведчанасць кіраўнікоў беларускіх дыпмісій пра апошнія тэндэнцыі, актуальныя кірункі і праблемныя аспекты развіцця беларускага грамадства і дзяржавы”.

“Сёлета мы дадаткова ўзмацнілі практычны патэнцыял нашага мерапрыемства. Гэта фактычна дыялог паміж дыпкорпусам Беларусі і лектарамі — прадстаўнікамі бізнесу, розных міністэрстваў і ведамстваў нашай краіны”, — сказаў кіраўнік знешнепалітычнага ведамства, падкрэсліўшы, што навучанне дыпламатаў таксама з’яўляецца “цудоўнай магчымасцю для беларускіх прадпрыемстваў і канцэрнаў завязаць патрэбныя знаёмствы, адкрыць для сябе новыя рынкі і напрамкі будучага ўзаемадзеяння”.

Паводле інфармацыі кіраўніка МЗС, на працягу пяці дзён дыпламаты сустрэнуцца з кіраўніцтвам міністэрстваў і ведамстваў, наведаюць “прадпрыемствы, аб’екты культурнага і гістарычнага значэння”, праслухаюць лекцыі ў Акадэміі кіравання, паўдзельнічаюць у круглых сталах, правядуць “індывідуальныя сустрэчы з менеджментам прадпрыемстваў-экспарцёраў”.

“Запланаваныя нарады з кіраўніцтвам урада Беларусі, прадстаўнікамі Канстытуцыйнага суда, Нацыянальнага банка, Беларускай чыгункі ды інш. Адбудуцца выязныя мерапрыемствы — наведванне Беларускай універсальнай таварнай біржы, Беларускай гандлёва-прамысловай палаты, ААТ “МТЗ”, натурнай пляцоўкі Нацыянальнай кінастудыі “Беларусьфільм”, — гаворыцца ў паведамленні.

У семінары ўдзельнічае каля 60 чалавек.