Палітвязень Максім Знак увайшоў у шорт-ліст прэміі Цэнтра Вацлава Гавела

17 ліпеня, Позірк. Асуджаны з палітычных матываў адвакат, аўтар кнігі “Зэкамерон” Максім Знак увайшоў у шорт-ліст прэміі Цэнтра Вацлава Гавела.

Штогадовая ўзнагарода Disturbing the Peace Award to a Courageous Writer at Risk прысуджаецца аўтарам “выбітных твораў мастацкай літаратуры, літаратуры нон-фікшн, біяграфій, мемуараў, драматургіі або паэзіі, якія мужна адстойваюць іншадумства і падвяргаюцца несправядлівасці”.

Апрача Знака ў шорт-лісце прэміі сёлета таксама літаратары з Індыі, Ірана і Кітая.

У 2021 годзе гэтую ўзнагароду атрымаў беларускі паэт Зміцер Строцаў.

У лютым 2021 года пераклад кнігі Знака “Зэкамерон” атрымаў прэмію PEN Translates Англійскага ПЭН-клуба.

Пераклад на англійскую мову зрабіў прафесар Лонданскага ўніверсітэта, даследчык беларускай гісторыі і літаратуры Джым Дынглі.

Максім Знак — юрыст, прадстаўнік штаба экс-банкіра Віктара Бабарыкі, які прэтэндаваў на пасаду прэзідэнта, член першага складу Каардынацыйнай рады па ўрэгуляванні палітычнага крызісу ў Беларусі. 6 верасня 2021 года асуджаны на 10 гадоў пазбаўлення волі паводле арт. 361 (заклікі да дзеянняў, накіраваных на прычыненне шкоды нацыянальнай бяспецы), арт. 357 (змова з мэтай захопу ўлады неканстытуцыйным шляхам), арт. 361¹ (стварэнне экстрэмісцкага фарміравання або ўдзел у ім) Крымінальнага кодэкса.

21 траўня 2022 года працоўная група па адвольных затрыманнях ААН накіравала беларускім уладам паведамленне аб прызнанні неправамерным пазбаўленне волі Знака.

Палітвязень знаходзіцца ў рэжыме інкамунікада (без сувязі са знешнім светам) з лютага 2023 года.