МНС: У Мінску ліўнем падтоплена 38 участкаў дарог

18 ліпеня, Позірк. Па стане на 13:00 ліўнем у Мінску было падтоплена 38 участкаў дарог, паркінг, адзін будынак і два падземныя пераходы, паведамляе Міністэрства па надзвычайных сітуацыях.

“Найбольш складаным участкам” ведамства назвала раён станцыі метро “Парк Чалюскінцаў”, рух на якой быў прыпынены. “На месцы працуюць ратавальнікі. Пры дапамозе мотапомп яны праводзяць работы па адпампоўцы вады”, — гаворыцца ў паведамленні МНС. Да гэтага моманту праца станцыі адноўленая.

Акрамя гэтага, адзначае МНС, зачынены вестыбюль на станцыі метро “Усход”.

Таксама ў месцах падтапленняў працуе тэхніка Рэмаўтадара.

Як паведамлялася, праз непагадзь у сталіцы была паралізаваная праца 46 маршрутаў грамадскага транспарту: 24 тралейбусных, 16 аўтобусных і 6 трамвайных.

Вада затапіла розныя ўчасткі амаль 30 вуліц і праспектаў, уключаючы Незалежнасці і Пераможцаў. У асноўным непагадзь закранула паўночную палову горада і цэнтр.

Дынаміка радарнай карты сведчыць, што ў бліжэйшы час моцны дождж не спыніцца.

На 18 ліпеня Белгідрамет прагназаваў у Мінску кароткачасовы дождж з верагоднасцю 70–80% (кароткачасовым лічыцца дождж працягласцю да трох гадзін), штармавое папярэджанне не выпускалася.