“Белдзяржстрах” выплаціў каля 390 тыс. рублёў пацярпелым ад урагану

22 ліпеня, Позірк. За тры дні пасля ўрагану страхавая арганізацыя “Белдзяржстрах” выплаціла каля 390 тыс. рублёў пацярпелым ад непагадзі, паведамляе прэс-служба Гомельскага аблвыканкама.

Колькасць заяў аб кампенсацыі шкоды, прычыненай маёмасці стыхіяй, перавысіла 7.500. Заявы “паступаюць, але іх плынь знізілася”, канстатуюць улады.

Адзначаецца, што на працягу месяца з дня ўзнікнення надзвычайнай сітуацыі (НС) мясцовыя органы ўлады на падставе хадайніцтваў разглядаюць заявы аб аб’ёмах пашкоджанняў маёмасці (будынкі, кватэры, абсталяванне, транспарт).

Рашэнне пра фінансавую падтрымку прымае камісія па НС пры райвыканкаме, зыходзячы ў кожным выпадку з фінансавага становішча пацярпелых, наяўнасці страхоўкі, іншых уважлівых прычын.

Згодна з інструкцыяй аб парадку працы рэспубліканскіх органаў дзяржкіравання пры НС, памер фінансавай падтрымкі юрыдычным асобам, якія не застрахавалі маёмасць, як правіла, не павінен перавышаць 50% сумы шкоды.

Фінансаванне мерапрыемстваў па ліквідацыі НС ажыццяўляецца за кошт сродкаў рэзервовых фондаў урада і мясцовых органаў, калі сродкаў арганізацый у зонах НС, рэспубліканскіх органаў дзяржкіравання, мясцовых бюджэтаў няма ці не хапае.

Паводле інфармацыі Міністэрства працы і сацабароны, жыхары Беларусі, якія пацярпелі ў выніку ўрагану, могуць таксама звярнуцца па аднаразовую дзяржаўную дапамогу. Галоўным крытэрыем яе аказання з’яўляецца сярэднедушавы даход сям’і. Паводле закону ён павінен быць ніжэй за 150% бюджэту пражытачнага мінімуму (БПМ), гэта значыць на аднаго члена сям’і не перавышаць 628,1 рубля.

Памер аднаразовай сацдапамогі можа вар’іравацца ў залежнасці ад складанасці жыццёвай сітуацыі, у якой апынулася сям’я. Максімальны памер дапамогі — 10 БПМ (4.067,4 рубля).

Раней паведамлялася, што ўлады Гомельскай вобласці прынялі 7.072 заявы аб пацярпелай ад шквалістага ветру маёмасці, з іх 860 паступіла 19 ліпеня. На той момант было абследавана 2.699, на выплату накіравалі 127 заяў (4,7% просьбітаў).

Непагадзь 13 і 14 ліпеня ў Беларусі прывяла да маштабных пашкоджанняў у сістэме электраперадачы, парушэнняў водазабеспячэння, разбурэнняў. Найбольш ад ураганнага ветру пацярпела Гомельская вобласць, дзе ўводзілі рэжым надзвычайнай сітуацыі.

Паводле інфармацыі МНС, у тыя дні праз непагадзь загінула шэсць чалавек.

Паводле прагнозу спецыялістаў Міністэрства энергетыкі, не менш як месяц спатрэбіцца на поўнае аднаўленне электрасетак у Гомельскай вобласці.

Лукашэнка абвінаваціў пацярпелых ад непагадзі грамадзян у “няправільным разуменні” НС. Сярод жыхароў Беларусі “ёсць такія грамадзяне, для якіх усё заўсёды будзе дрэнна”, яны “не хочуць разумець”, што ў мінулыя дні ў краіне адбылася “надзвычайная сітуацыя”, заявіў ён 19 ліпеня на селектарнай нарадзе.

Непагадзь ён назваў “вайной”, толькі без “стральбы з аўтаматаў і кулямётаў”.