Праект Propovednik прызнаны “экстрэмісцкім фарміраваннем”

24 ліпеня, Позірк. Міністэрства ўнутраных спраў 24 ліпеня прызнала “экстрэмісцкім фарміраваннем” праект Propovednik.

У яго ўключаныя тэлеграм-канал, тэлеграм-чат, старонкі ў “Х” (“Твітары”) і “Фэйсбуку”, якія належаць праекту, вынікае з адпаведнага пераліку на сайце ведамства.

МУС назвала датычным да яго 52-гадовага Уладзіміра Шпака.

Асноўнай мэтай праекту ў ягоных сацыяльных сетках названыя “вызваленне Беларусі ад дыктатуры, у тым ліку і Ціханоўскай дыктатуры”, а таксама “сыход ад уплыву фашысцкай Расіі”.

15 лютага паведамлялася аб уключэнні ў спіс “экстрэмісцкіх матэрыялаў” кантэнту тэлеграм-канала і чата “Propovednyk чат”, 23 траўня — аб узбуджэнні крымінальнай справы супраць кіраўніцтва праекта (імёны невядомыя. — “Позірк”.) за “распальванне нацыянальнай і сацыяльнай нянавісці, заклікі да гвалту” і “тэрарызм”. Канкрэтныя артыкулы не называліся.

Як мяркуецца, Шпак тады быў затрыманы.