На наступным тыдні Літва пачне будаваць “паркі сродкаў контрмабільнасці” на мяжы з Беларуссю і РФ

29 ліпеня, Позірк. На наступным тыдні ў Літве пачнецца збудаванне “паркаў сродкаў контрмабільнасці” на мяжы з Беларуссю і Расіяй, усяго іх будзе 27, паведаміў 29 ліпеня партал LRT са спасылкай на міністра абароны Лаўрынаса Кашчунаса.

Да канца года гэтыя паркі плануецца запоўніць “зубамі дракона” і зборнымі “вожыкамі” (загароды супраць бронетэхнікі), а таксама “іспанскімі канямі” (драцяныя супрацьпяхотныя загароды). Паводле слоў Кашчунаса, у выпадку небяспекі “пасля атрымання сігналаў выведкі” гэтыя сродкі з паркаў “будуць дастаўленыя да месца ўсталёўкі”.

На агульную лінію абароны Літвы на працягу дзесяцігоддзя плануецца выдаткаваць 600 мільёнаў еўра. Частку сродкаў дасць Еўрасаюз. Паводле інфармацыі літоўскага міністра ўнутраных спраў Агне Білатайце, ЕС плануе выдзеліць 150 млн еўра на абарону знешніх усходніх межаў і іх інфраструктуры.

Сёлета ў студзені кіраўнікі ваенных ведамстваў краін Балтыі ўхвалілі канцэпцыю будаўніцтва абарончых збудаванняў на межах з РФ і Беларуссю, закліканых абмежаваць мабільнасць войскаў праціўніка.

Паводле слоў міністра абароны Эстоніі Хана Пеўкура, будаўніцтва такіх збудаванняў з’яўляецца “старанна прадуманым праектам, неабходнасць якога вынікае з цяперашняй сітуацыі з бяспекай”. Апрача непасрэднай канцэнтрацыі тэхнікі, боепрыпасаў і жывой сілы канцэпцыя прадугледжвае актыўнае выкарыстанне ландшафту прыгранічнай мясцовасці, стварэнне сеткі бункераў, а таксама пунктаў падтрымкі войска і ліній размеркавання рэсурсаў.

24 студзеня Кашчунас, які займаў тады пасаду кіраўніка Камітэта па нацыянальнай бяспецы і абароне Сейма Літвы, прапанаваў разгледзець магчымасць стварэння бункернай інфраструктуры на мяжы з Беларуссю і Расіяй.

“Пэўныя рашэнні па мерах контрмабільнасці ўжо прынятыя — <…> набыццё мін, набыццё дыстанцыйных мін, — цытаваў яго партал навін Delfi. — Аднак я думаю, што нам трэба ісці далей. Эстонцы кажуць пра прыгранічную бункерызацыю, яны кажуць пра 600 бункераў. Мы можам дадаткова падумаць пра нешта падобнае”.

“Мы можам падумаць пра пэўныя інжынерныя рашэнні пры выкарыстанні нашых лясоў, мы можам падумаць пра больш шырокае прымяненне ўсіх меліярацый у абаронных мэтах. Гэта тое, што неабходна зрабіць”, — сказаў Кашчунас.

Паводле яго слоў, “фартыфікацыйныя палосы нельга ўсталёўваць загадзя”, каб “не даць праціўніку даведацца пра іх месцазнаходжанне”. “Жалезабетонныя блокі, [процітанкавыя] вожыкі, розныя іншыя сродкі прыпынку цяпер вырабляюцца і будуць складавацца ў пэўных месцах, не заўсёды вядомых публічна, каб у выпадку неабходнасці іх можна было размясціць і прыкрыць агнём, калі выведка паведаміць, што маецца небяспека”, — дадаў ён.

Будаўніцтва збудаванняў пачынаецца на фоне шырокай дыскусіі сярод уладаў Літвы пра патэнцыйны распаўсюд агрэсіі Расіі на краіны НАТО, у тым ліку праз тэрыторыю Беларусі.