43 беларусы вывезеныя з сектара Газа на тэрыторыю Егіпта — МЗС
15 лістапада, Позірк. 43 грамадзяніна Беларусі пакінулі сектар Газа праз памежны пераход “Рафах” на мяжы з Егіптам, паведаміў 15 лістапада неафіцыйны тэлеграм-канал Міністэрства замежных спраў “Глас МИДа”.
Удакладняецца, што эвакуацыя праведзеная “беларускім бокам у кантакце з калегамі з Ізраіля і Егіпта, а таксама пры садзейнічанні Расіі і Катара”.
“Найбліжэйшым часам чакаецца іх вяртанне на падзіму”, — гаворыцца ў паведамленні.
15 лістапада аб падрыхтоўцы эвакуацыі з сектара Газа 48 грамадзян Беларусі ў складзе груп, якія фарміруюцца МНС Расіі, заявіў дарадца кіраўніка гэтага ведамства Данііл Мартынаў.
Паводле яго слоў, пытаннямі эвакуацыі разам з расійскім бокам займаюцца “дыпламаты з Беларусі”.
Мартынаў удакладніў, што пасля вывазу беларускіх грамадзян з сектара ім будзе аказана неабходная дапамога, пасля чаго іх адправяць у Маскву эвакуацыйнымі авіярэйсамі.
Як раней паведамляў “Позірк”, у адным эвакуацыйным спісе з расіянамі знаходзяцца каля 40 грамадзян Беларусі і членаў іх сем’яў. У асноўным гэта жонкі мясцовых жыхароў, іх мужы, а таксама дзеці, большасць з якіх таксама мае беларускае грамадзянства.
6 лістапада Міністэрства замежных спраў Беларусі паведаміла пра вываз з тэрыторыі Ізраіля спецрэйсам кампаніі “Белавія” 117 суайчыннікаў.
Улады назвалі гэты рэйс “гуманітарным на камерцыйнай аснове”. Паводле неафіцыйнай інфармацыі, білет каштаваў больш за 500 долараў.
Пасольства Беларусі ў Ізраілі тады паведаміла, што ў сувязі з сітуацыяй у рэгіёне ў дыпмісію звярнуліся больш за 500 суайчыннікаў.
Раней міністр замежных спраў Сяргей Алейнік сцвярджаў, што эвакуацыі беларускіх грамадзян з Ізраіля, ахопленага абвастрыўшымся канфліктам з кантралюючым сектар Газа радыкальным рухам ХАМАС, перашкаджаюць уведзеныя ЗША санкцыі ў дачыненні да авіякампаніі “Белавія”.
Палесціна-ізраільскі канфлікт абвастрыўся 7 кастрычніка, калі на тэрыторыю Ізраіля з сектара Газа ўварваліся баевікі ваеннага крыла палестынскага руху ХАМАС. Адначасова з Газы пачаўся інтэнсіўны ракетны абстрэл ізраільскай тэрыторыі.
Паводле апошніх звестак, у выніку тэрарыстычнай атакі ў Ізраілі загінула каля 1,2 тыс. чалавек з 37 краін, у тым ліку трое грамадзян Беларусі; пацярпела 7,3 тыс. чалавек. Каля 240 чалавек знаходзяцца ў закладніках.
Колькасць загінулых у сектары Газа ў выніку распачатай ізраільскай ваеннай аперацыі, якая ўжо перайшла ў наземную фазу, перавысіла 11 тыс. чалавек, свае дамы былі вымушаныя пакінуць каля 1,5 млн жыхароў сектара.
