Савет Еўропы прыпыняе супрацоўніцтва з Беларуссю ў сувязі з “актыўным удзелам краіны ў агрэсіі Расійскай Федэрацыі супраць Украіны”

17 сакавіка, BPN. Камітэт міністраў Савета Еўропы 17 сакавіка прыняў рашэнне прыпыніць усе адносіны з Беларуссю ў сувязі з “актыўным удзелам краіны ў агрэсіі Расійскай Федэрацыі супраць Украіны”, паведамляе прэс-служба СЕ.

Удакладняецца, што гэта таксама тычыцца ўдзелу Беларусі ў частковых пагадненнях СЕ, у тым ліку Венецыянскай камісіі, але “не ўшчамляе правоў Беларусі як дагаворнага боку міжнародных канвенцый”.

Камітэт таксама вырашыў спыніць любое тэхнічнае супрацоўніцтва з афіцыйным Мінскам, аднак “падтрымліваць і ўмацоўваць адносіны з беларускай грамадзянскай супольнасцю і апазіцыяй у выгнанні”.

Каментуючы рашэнне Камітэта міністраў СЕ, у МЗС Беларусі заявілі, што “Савет Еўропы прадказальна пайшоў на повадзе ў тых сіл на Захадзе, якія на фоне падзей ва Украіне імкнуцца максімальна абмежаваць або поўнасцю перакрыць каналы для міжнароднага дыялогу, узвесці новыя штучныя раздзяляльныя лініі ў Еўропе”.

На думку ведамства, сітуацыя “яшчэ раз наглядна дэманструе, што ні дзяржавы — члены Савета Еўропы, ні краіны, з якімі гэта арганізацыя падтрымлівае супрацоўніцтва, не могуць быць абаронены ад валюнтарызму заходняй кааліцыі, якая будзе дзейнічаць, зыходзячы не са сваіх жа каштоўнасцей, а выключна з уласных вузкіх геапалітычных інтарэсаў”.

Падкрэсліваецца, што рашэнне “ставіць на паўзу канструктыўнае ўзаемадзеянне з Рэспублікай Беларусь па шэрагу напрамкаў, уключаючы праблематыку пакарання смерцю”.

Мінск мае намер “правесці рэвізію прававых механізмаў Савета Еўропы, у якіх удзельнічае беларускі бок, з пункту гледжання іх рэальнай запатрабаванасці і адпаведнасці нашым нацыянальным інтарэсам на гэтым этапе”.