Беларусь не падтрымала рэзалюцыю ААН аб праве бежанцаў на вяртанне ў Абхазію і Паўднёвую Асецію

8 чэрвеня, BPN. Генасамблея Арганізацыі Аб’яднаных Нацый прыняла рэзалюцыю, якая пацвярджае права бежанцаў і вымушана перамешчаных асоб на вяртанне ў непрызнаныя Абхазію і Паўднёвую Асецію. 

Як паведамляе выданне newsgeorgia.ge, дакумент падтрымалі 100 краін, 59 устрымаліся. 

Супраць рэзалюцыі прагаласавалі дзевяць краін — Беларусь, Расія, Сірыя, Нікарагуа, Судан, Зімбабвэ, Бурундзі, Куба і КНДР. 

У 2008 годзе прыняцце рэзалюцыі ініцыявала Грузія, галасаванне ў ААН па гэтым пытанні праходзіць штогод. 

“Рэзалюцыя асуджае гвалтоўныя дэмаграфічныя змены ў акупаваных Расіяй рэгіёнах Грузіі, пацвярджае права перамешчаных асоб, незалежна ад іх этнічнай прыналежнасці, на годнае і бяспечнае вяртанне ў свае дамы, і падкрэслівае неабходнасць паважаць і абараняць свае правы ўласнасці”, — гаворыцца ў заяве МЗС Грузіі па выніках галасавання. 

Ведамства падкрэсліла важнасць рэзалюцыі ў кантэксце “цяжкай сітуацыі з правамі чалавека на акупаваных Расіяй тэрыторыях” і на фоне вайны ва Украіне, якая пачалася “ў выніку агрэсіі РФ” і выклікала “значны рост колькасці бежанцаў і вымушаных перасяленцаў”. 

Абхазія і Паўднёвая Асеція — самаабвешчаныя дзяржавы на тэрыторыі Грузіі, не прызнаныя міжнароднай супольнасцю. Пасля ўзброенага канфлікту 2008 года, у якім Абхазію і Паўднёвую Асецію актыўна падтрымала Расія, Тбілісі дэ-факта страціў кантроль над гэтымі тэрыторыямі. 

Юрыдычна Беларусь не прызнала незалежнасць Абхазіі і Паўднёвай Асеціі. 

28 верасня 2022 года Аляксандр Лукашэнка пасля працяглага знаходжання ў Сочы і перамоваў з прэзідэнтам РФ Уладзімірам Пуціным раптам наведаў Піцунду і сустрэўся з кіраўніком Абхазіі Асланам Бжаніяй. Прэзідэнт Грузіі Саламе Зурабішвілі і МЗС краіны асудзілі гэты крок. 

21 лютага гэтага года Лукашэнка прыняў Бжанію ў Мінску. Кіраўнік грузінскай дзяржавы і знешнепалітычнае ведамства зноў раскрытыкавалі беларускія ўлады за такія кантакты ў абход Тбілісі. 

Праз тыдзень пасля той сустрэчы стала вядома, што Абхазія плануе пастаўляць у Беларусь віно і іншыя тавары, а ўзамен хоча атрымліваць малочную прадукцыю.