АЭС дапамагла Беларусі замясціць да 4 млрд кубаметраў расійскага газу — Грызлоў

9 кастрычніка, Позірк. Замясціць да 4 млрд кубаметраў газу ўдалося Беларусі дзякуючы працы атамнай электрастанцыі. Гэта прывяло да скарачэння расійскага экспарту ў РБ на 6,7% паводле вынікаў сямі месяцаў 2023 года, заявіў амбасадар РФ у Беларусі Барыс Грызлоў.

Паводле яго слоў, якія перадае прэс-служба амбасады, “гэтая лічба сама па сабе не адлюстроўвае ўсёй карціны”. “Калі “ачысціць” расійскія пастаўкі ад сыравіннага складніка, то ўсё ўстане на свае месцы. Па астатніх паказчыках па-ранейшаму фіксуецца рост: у прыватнасці, у студзені — ліпені ён склаў 2,9%, або 8,1 млрд долараў у грашовым эквіваленце”, — удакладніў Грызлоў.

Ён падкрэсліў, што “ў такой важнай катэгорыі тавараў, як машыны і абсталяванне, экспарт і зусім павялічыўся на 18,5%, а па будаўнічых матэрыялах — на 17,6%”. “Сёння наша мэта — як мінімум паўтарыць тэмпы нарошчвання несыравіннага экспарту, якія расійская эканоміка паказала па выніках 2022 года. Нагадаю, тады гэты паказчык у гандлі з Беларуссю склаў +7,2%, а аб’ём паставак на беларускі рынак айчыннай прадукцыі з больш высокім дадатковым коштам дасягнуў 14,5 млрд долараў”, — сказаў Грызлоў.

Расійскі дыпламат заявіў, што “асноўны рэсурс росту — далейшае ўмацаванне кааперацыйных сувязяў з упорам на стварэнне новых сумесных вытворчасцяў на тэрыторыі Расіі і Беларусі”. У ліку перспектыўных галін, “дзе мы бачым вялікі патэнцыял для нарошчвання кааперацыі з нашымі беларускімі сябрамі” — машынабудаванне, авіяцыя, мікраэлектроніка, фармацэўтыка, хімічная вытворчасць, лёгкая прамысловасць і іншыя.

Грызлоў адзначыў, што “трансфармацыя структуры экспарту на карысць высокатэхналагічнай прадукцыі сведчыць у тым ліку і аб паспяховай мінімізацыі наступстваў заходніх санкцый”.

3 кастрычніка Аляксандр Лукашэнка заявіў аб стварэнні камісіі, якая курыруе пытанні экспарту беларускіх тавараў, яе ўзначаліць амбасадар Беларусі ў Расіі Дзмітрый Круты.

У студзені — жніўні 2023 года знешнегандлёвы абарот тавараў склаў 54 млрд 122,3 млн долараў — на 14,8% больш, чым за аналагічны перыяд 2022-га, сведчаць дадзеныя Нацыянальнага статыстычнага камітэта.Беларуская АЭС узводзіцца паблізу Астраўца (Гродзенская вобласць) пераважна за кошт крэдыту Расіі па расійскім праекце ВВЭР-1200. Генеральным праекціроўшчыкам і генпадрадчыкам выступае інжынірынгавая кампанія “АСЭ”, якая з’яўляецца галаўной арганізацыяй інжынірынгавага дывізіёна расійскай дзяржкарпарацыі “Расатам”.