БАА: У лістападзе рэалізавана рэкордная з пачатку года колькасць аўтамабіляў
6 снежня, Позірк. У лістападзе членамі Беларускай аўтамабільнай асацыяцыі (БАА) рэалізавана 2.689 легкавых і 368 лёгкіх камерцыйных аўтамабіляў, што з’яўляецца рэкордным штомесячным паказчыкам продажаў бягучага года, вынікае з інфармацыі дырэктара БАА Сяргея Варыводы.
Рынак новых легкавых аўтамабіляў у лістападзе вырас да адпаведнага перыяду мінулага года на 340%, аднак агулам тэмп аднаўлення рынку легкавых аўтамабіляў за студзень — лістапад 2023 года склаў 140%, што “сведчыць аб паступовым вычарпанні эфекту нізкай базы і запаволенні тэмпу аднаўленчай дынамікі”.
Адчуваную падтрымку попыту надае рост рэальных грашовых даходаў насельніцтва і камфортнае аўтакрэдытаванне спажыўцоў, лічыць Варывода. Пры гэтым прапанова ў дылерскіх аўтасалонах працягвае пашырацца пры захаванні адносна стабільнага ўзроўню коштаў: калі ў пачатку года аўтадылеры паведамлялі аб 35 мадэлях новых легкавых аўтамабіляў, то ў лістападзе мадэльны шэраг склаў 75 мадэляў.
Дырэктар БАА адзначыў, што за мінулыя 11 месяцаў у чатыры разы вырасла рэалізацыя EV-аўтамабіляў, аднак гэта з’яўляецца хутчэй за следствам эфекту нізкай базы. Абсалютныя продажы зялёных аўтамабіляў дылерамі па-ранейшаму невялікія і склалі ў лістападзе 53 адзінкі.
Доля легкавых аўтамабіляў кітайскіх марак у лістападзе перавысіла 84%, пры гэтым 70% дылерскіх продажаў забяспечылі легкавыя аўтамабілі, якія сышлі з канвеера СЗАТ “БелДжы”.
Увосень пачаўся продаж аўтамабіляў кітайскіх вытворцаў Hongqi (уваходзіць у канцэрн FAW Group) і Haval (Great Wall Motors). Анансавана з’яўленне на рынку прадукцыі кампаніі Dongfeng Motors.
7 чэрвеня Міністэрства прамысловасці паведаміла, што “БелДжы” плануе ў 2023 годзе рэалізаваць на ўнутраным рынку 9,5 тыс. аўтамабіляў — у 2,2 разы больш у параўнанні з 2022-м (4.355).
Па выніках 2022 года, сведчаць звесткі БАА, дылеры прадалі 14.843 легкавыя аўтамабілі. Лідзіравалі Geely (4.355), Lada (3.782) і Kia (1.462).
У 2021 годзе ў Беларусі было прададзена 46.837 легкавых аўтамабіляў, у 2020-м — 53.537, 2019-м — 64.504.