Мінэканомікі: Росту ВУП спрыяе попыт на рынку РФ і павелічэнне продажаў у краінах далёкай дугі

19 снежня, Позірк. Прамысловасць застаецца адным з лідараў росту валавога ўнутранага прадукту Беларусі, заявіў намеснік міністра эканомікі Андрэй Картун, каментуючы дынаміку асноўных паказчыкаў сацыяльна-эканамічнага развіцця краіны па выніках 11 месяцаў бягучага года.

Паводле яго слоў, якія прыводзіць прэс-служба Мінэканомікі, у студзені — лістападзе высокія тэмпы росту (11%) прадэманстравала будаўніцтва.

“Другі месяц запар дзякуючы поспехам у жывёлагадоўлі ў станоўчай зоне — сельская гаспадарка. Істотна прыбавілі па малаку (больш чым на 6%), мясе жывёлы і птушкі (на 3,4%). Працягвае ўпэўнены рост гандаль: рознічны (+8,2%, аптовы — +13,5%). Устойліва скарачаюцца запасы прадукцыі. За апошнія сем месяцаў іх суадносіны да аб’ёмаў вытворчасці зменшыліся больш чым на 10 працэнтных пунктаў”, — адзначыў чыноўнік.

Паводле яго слоў, захоўваецца высокі попыт на беларускую прадукцыю на знешніх рынках: “Коштавыя аб’ёмы экспарту — па-ранейшаму на 11-гадовым максімуме. Высокімі тэмпамі расце экспарт спажывецкіх (+9,3%) і прамежкавых тавараў (+8,1%) тавараў. Гэтаму спрыяюць аднаўленне інвестыцыйнай актыўнасці і адкладзены попыт на рынку РФ, а таксама павелічэнне продажаў у краінах Азіі, Паўночнай і Паўднёвай Амерыкі, Кітая”.

Паводле звестак Нацыянальнага статыстычнага камітэта, у студзені — лістападзе 2023-га аб’ём прамысловай вытворчасці ў бягучых цэнах склаў 170,6 млрд рублёў (+7,9% да ўзроўню студзеня — лістапада 2022-га, у тым ліку па відах эканамічнай дзейнасці: горназдабыўная прамысловасць (+4,6%), апрацоўчая прамысловасць (+9,4%), забеспячэнне электраэнергіяй, газам, парай, гарачай вадой і кандыцыянаваным паветрам (-1,6%), водазабеспячэнне, збор, апрацоўка і выдаленне адходаў, дзейнасць па ліквідацыі забруджванняў (+1,8%).

Аб’ём валавога ўнутранага прадукту (ВУП) Беларусі за студзень — лістапад 2023 года ў бягучых цэнах склаў 198,1 млрд рублёў. У супастаўных цэнах да ўзроўню студзеня — лістапада 2022 года ВУП вырас на 3,8%. У параўнанні з паказчыкамі студзеня — кастрычніка 2023 года да аналагічнага леташняга перыяду дынаміка не змянілася.