На канферэнцыі па Беларусі “Хельсінскі дыялог” 11–12 студзеня пройдзе шэсць панэльных дыскусій
Хельсінкі (фота мае ілюстрацыйны характар)
9 студзеня, Позірк. Праграма канферэнцыі “Хельсінкскі дыялог: дэмакратычная будучыня для Беларусі”, якая пройдзе 11–12 студзеня ў сталіцы Фінляндыі, уключае шэсць панэльных дыскусій, вынікае з паведамлення на сайце Парламенцкай асамблеі Савета Еўропы (ПАСЕ).
Форум арганізуе ПАСЕ і Міністэрства замежных спраў Фінляндыі ў супрацоўніцтве з офісам беларускага дэмакратычнага лідара Святланы Ціханоўскай.
Тэматычныя панэлі прысвечаны “цяперашняму геапалітычнаму кантэксту вакол Беларусі”, “беларускай нацыянальнай ідэнтычнасці”, “палітычным зняволеным”, “узмацненню падтрымкі дэмакратычных сіл у краіне”, а таксама “выбарчым пытанням” і “стварэнню прадстаўнічага органа беларускага народа”.
Канферэнцыя заклікана “прадэманстраваць міжнародную падтрымку беларусаў, якія імкнуцца пабудаваць дэмакратычную будучыню для сваёй краіны”. На яе адкрыцці выступяць Ціханоўская, міністр замежных спраў Фінляндыі Эліна Валтанен і генеральны сакратар ПАСЕ Дэспіна Хацівасіліу-Цовіліс (раней заяўлялася пра уступную прамову старшыні ПАСЕ Ціні Кокса — “Позірк”.). Мадэратар форуму — кіраўнік фінскай дэлегацыі ў ПАСЕ, старшыня камітэта па замежных справах парламента Фінляндыі Кіма Кільюнен.
Жывая трансляцыя адкрыцця і першай панэльнай дыскусіі пра Беларусь у цяперашнім геапалітычным кантэксце пачнецца 11 студзеня ў 14:00 паводле мінскага часу.
Адзначаецца, што канферэнцыя ў Хельсінкі з’яўляецца часткай “працяглага рэгулярнага дыялогу” Парламенцкай асамблеі Савета Еўропы з беларускімі дэмакратычнымі сіламі.
Паводле інфармацыі ПАСЕ, на пленарным пасяджэнні 25 студзеня ў Страсбургу асамблея, якая аб’ядноўвае парламентарыяў з 46 краін — членаў Савета Еўропы, разгледзіць даклад Кільюнена “Дэмакратычная будучыня Беларусі”.
